भारत नेपाल र बंगलादेश होइन, चुनावबाटै सत्ता परिवर्तन गर्छौं : प्रकाश राज

अभिनेता तथा अभियन्ता प्रकाश राजले भारतमा शासन परिवर्तन हुनुपर्ने बताएका छन्। तर, त्यसका लागि हिंसा वा असंवैधानिक बाटो नभई चुनाव र संवैधानिक प्रक्रियालाई अपनाउनुपर्ने उनको भनाइ छ।

उनले भारत नेपाल र बंगलादेशजस्तो नभएको उल्लेख गर्दै लोकतान्त्रिक माध्यमबाटै राजनीतिक परिवर्तन गर्ने बताएका हुन्।

शुक्रबार दिल्लीमा प्रस्तावित तिरंगा मार्चअघि ककरोच जनता पार्टी (सीजेपी) का संस्थापक अभिजीत दिप्के पक्राउ परेपछि राजको यस्तो भनाइ आएको हो। मतदाता नामावलीको विशेष गहन पुनरावलोकन (एसआईआर) प्रक्रियामा अनियमितता भएको आरोप लगाउँदै उक्त संगठनले प्रमुख निर्वाचन आयुक्त ज्ञानेश कुमारविरुद्ध प्रदर्शन गर्दै आएको छ।

विज्ञापन

भारतीय सञ्चारमाध्यमका अनुसार राजले उत्तर प्रदेशदेखि सन् २०२९ को लोकसभा निर्वाचनसम्म चुनावी माध्यमबाट राजनीतिक परिवर्तनका लागि संघर्ष गर्ने बताएका छन्। उनले भारतमा शासन परिवर्तनको माग गर्नुको अर्थ लोकतान्त्रिक व्यवस्थाबाहिर जानु नभएको स्पष्ट पारे।

राजले भने, ‘हामी शासन परिवर्तन चाहन्छौं र यस देशमा लोकतान्त्रिक तरिकाले परिवर्तन गर्नेछौं। हामी नेपाल होइनौं, हामी बंगलादेश होइनौं। हामीसँग अम्बेडकर, गान्धी र भगत सिंहको विरासत छ। हामीसँग संविधान छ र मतदान गर्ने अधिकार छ।’

भारतमा शान्तिपूर्ण विरोध प्रदर्शनलाई अराजकताको रूपमा व्याख्या गर्न नहुने उनको भनाइ छ। नागरिकलाई सरकारसँग प्रश्न गर्ने, आफ्ना माग राख्ने, प्रदर्शन गर्ने र मतदानमार्फत राजनीतिक परिवर्तन ल्याउने संवैधानिक अधिकार रहेको उनले बताए।

राजले केन्द्र सरकारले प्रदर्शनकारीलाई दबाउन बल प्रयोग गरेको आरोप पनि लगाए। सरकारले प्रदर्शनकारीसँग संवाद नगरेको र बल प्रयोग गरेको भन्दै उनले असन्तुष्टि व्यक्त गरे। उनले भने, ‘तपाईंहरूले हामीसँग संवाद गरिरहनुभएको छैन, बरु बल प्रयोग गरिरहनुभएको छ। त्यसैले हामीलाई यस्तो कदम चाल्न बाध्य पारिएको हो।’

तिरंगा मार्चअघि प्रदर्शनकारी पक्राउ परेको विषयमा पनि राजले प्रश्न उठाए। प्रधानमन्त्री नरेन्द्र मोदीको ‘हर घर तिरंगा’ अभियानको स्मरण गराउँदै उनले राष्ट्रिय झण्डासहित मार्चमा सहभागी हुन चाहने युवालाई किन रोकिएको भन्दै प्रश्न गरे।

‘म मोदीलाई सोध्दै छु, तपाईंको हर घर तिरंगा नारालाई के भयो? यस देशका युवाहरू तिरंगासँगै हिँड्न चाहन्छन्,’ उनले भने।

राजले प्रदर्शनका क्रममा महिला लगायत सहभागीमाथि प्रहरीले बल प्रयोग गरेको आरोप लगाउँदै विपक्षी दललाई यो विषय संसद्को हिउँदे अधिवेशनमा उठाउन आग्रह गरे। उनले नागरिकले शान्तिपूर्ण रूपमा आफ्ना असहमति व्यक्त गर्न पाउनुपर्ने बताउँदै सडक प्रदर्शन जारी रहने संकेत गरे।

किसान, संयुक्त किसान मोर्चा र नागरिक समाजका समूहबाट प्रदर्शनलाई समर्थन प्राप्त भइरहेको उल्लेख गर्दै राजले आगामी चरणमा ठुलो संख्यामा मानिस सडकमा उत्रिने दाबी गरेका छन्। उनका अनुसार चुनाव र संवैधानिक प्रक्रियामार्फत सरकारलाई चुनौती दिँदै सन् २०२९ को लोकसभा निर्वाचनसम्म राजनीतिक संघर्ष जारी रहनेछ।