राजस्थानमा ट्राभलर गाडी एक्सप्रेसवेबाट नालामा खस्यो, ८ जनाको मृ*त्यु

भारतको राजस्थानस्थित कोटामा दिल्ली–मुम्बई एक्सप्रेसवेमा ट्राभलर गाडी पुलियाबाट तल नालामा खस्दा आठ जनाको मृत्यु भएको छ। दुर्घटनामा घाइते भएका १७ जनालाई उद्धार गरिएको छ। दुर्घटनामा मृत्यु हुने सबै मध्यप्रदेशको बैतुलका बासिन्दा रहेको बताइएको छ।

दुर्घटना शनिबार बिहान करिब ६ बजे सिमलिया प्रहरी थाना क्षेत्रको एक्सप्रेसवेमा भएको हो। प्रहरी थाना प्रमुख नन्द सिंहका अनुसार उक्त गाडी भोपालबाट खाटुश्यामजी मन्दिरतर्फ जाँदै थियो। कराडिया टोलबाट केही किलोमिटर टाढा रहेको पुलियाबाट गाडी करिब १५ फिट तल खसेको थियो।

अँध्यारोका कारण उद्धार कार्यमा केही ढिलाइ भएको थियो। स्थानीय बासिन्दाका अनुसार केही शव सिटहरूबीच अड्किएका थिए। उनीहरूलाई निकै कठिनाइका साथ बाहिर निकालिएको थियो। घाइतेहरूलाई गाडीका झ्याल फुटाएर उद्धार गरिएको थियो।

विज्ञापन

उद्धारमा खटिएका टोलीका एक सदस्यका अनुसार गाडी एक्सप्रेसवेको सडकबाट तल झर्दा अगाडिको भाग अर्थात् बोनेटतर्फ ठोक्किएको हुन सक्ने आशङ्का गरिएको छ।

दुर्घटनामा गाडीको अगाडिको भाग पूर्ण रूपमा क्षतिग्रस्त भएको थियो। दुर्घटना यति भीषण थियो कि एक जनाको शव ड्यासबोर्डको सिसा फुटाएर बाहिर निस्किएको अवस्थामा भेटिएको थियो।

एक्सप्रेसवेमा केही समय यातायात अवरुद्ध

स्थानीय प्रहरीका अनुसार दुर्घटनाबारे बिहान करिब ६:१५ बजे सूचना प्राप्त भएको थियो। त्यसपछि प्रहरी र स्थानीय बासिन्दाको सहयोगमा तत्काल उद्धार कार्य सुरु गरिएको थियो।

दुर्घटनाका कारण केही समयका लागि एक्सप्रेसवेमा यातायातसमेत अवरुद्ध भएको थियो।