साइबर ब्युरोमा छलफलपछि घर फर्किए किशोर श्रेष्ठ, हिमेश पन्त प्रेस काउन्सिल जाने

जनआस्था साप्ताहिकका प्रधानसम्पादक तथा वरिष्ठ पत्रकार किशोर श्रेष्ठ नेपाल प्रहरीको साइबर ब्युरोमा भएको छलफलपछि घर फर्किएका छन् । राष्ट्रिय स्वतन्त्र पार्टी (रास्वपा) का नेता तथा कलाकार हिमेश पन्तसँग समाचारको विषयलाई लिएर भएको छलफलपछि श्रेष्ठ घर फर्किएका हुन् ।

नेपाल पत्रकार महासंघका महासचिव रामप्रसाद दाहालका अनुसार भोटाहिटीस्थित साइबर ब्युरोमा दुवै पक्षबीच छलफल भएको थियो । छलफलपछि श्रेष्ठ घर फर्किएका हुन् भने पन्त जनआस्थामा प्रकाशित समाचारको विषयलाई लिएर प्रेस काउन्सिल नेपाल जाने भएका छन् ।

प्रकाशित समाचारमा रास्वपा नेता पन्तको परिवारले धादिङको थाक्रे गाउँपालिका–१० का तिलकप्रसाद बिडारीको ४.५ रोपनी जग्गा हडपेको आरोप उल्लेख गरिएको थियो । उक्त समाचारप्रति आपत्ति जनाउँदै पन्तले साइबर ब्युरोमा निवेदन दिएका थिए । त्यसपछि श्रेष्ठले पनि सामाजिक सञ्जालमा पन्तले आफूविरुद्ध गरेको टिप्पणीलाई लिएर निवेदन दिएका थिए । दुवै पक्षका निवेदनमाथि छलफल गर्न प्रहरीले बोलाएको जनाएको छ ।

विज्ञापन

श्रेष्ठ र पन्तबीच करिब तीन घण्टा छलफल भएको थियो । छलफलपछि दुवै पक्षबीच मिलापत्रको कागज भएको र श्रेष्ठलाई घर जान अनुमति दिइएको हो ।

यस घटनाप्रति नेपाल पत्रकार महासंघले पनि आपत्ति जनाएको छ । महासंघले समाचारमा चित्त नबुझे स्थापित कानुनी प्रक्रिया र सम्बन्धित निकायमार्फत समाधान खोज्नुपर्ने भन्दै पत्रकारलाई साइबर ब्युरोमा लगिएको घटनाले प्रेस स्वतन्त्रताको मान्यतामाथि प्रश्न उठाएको जनाएको छ । महासंघले प्रेस काउन्सिल नेपाललाई आफ्नो क्षेत्राधिकारअनुसार प्रभावकारी भूमिका निर्वाह गर्नसमेत आग्रह गरेको छ ।

महासचिव दाहालले छलफलपछि श्रेष्ठ घर फर्किएको र पन्त प्रेस काउन्सिल जाने सहमति भएको जानकारी दिएका छन् । समाचारको विषयमा उत्पन्न विवाद अब प्रेस काउन्सिलमार्फत अघि बढ्ने देखिएको छ ।