सभापति पद अहंकारको श्रीपेच होइन, नागरिकप्रतिको दायित्व हो : गगन थापा

नेपाली कांग्रेसका नवनिर्वाचित सभापति गगनकुमार थापाले सभापतिको जिम्मेवारीलाई अहंकारको प्रतीक नभई नागरिकप्रतिको दायित्व पूरा गर्ने अवसरका रूपमा लिएको बताएका छन्।

शपथग्रहणपछि सम्बोधन गर्दै थापाले आफ्नो प्रतिबद्धता भाषणबाट नभई आगामी दिनमा गर्ने काम, लिने निर्णय र व्यवहारबाट प्रमाणित हुने बताए। सार्वजनिक बहसमा आफूले प्रस्तुत गर्ने विचार तथा सत्य र न्यायको पक्षमा उभिने भूमिकाले आफ्नो नेतृत्वको परीक्षण हुने उनको भनाइ थियो।

‘अबको अगाडिको यात्रा मेरो कर्मबाट हुन्छ। मैले निर्णय कसरी गर्छु, सार्वजनिक बहसमा कसरी प्रस्तुत हुन्छु र न्यायको पक्षमा कसरी उभिन्छु भन्ने कुराले मेरो परीक्षण हुनेछ,’ थापाले भने।

विज्ञापन

उनले विशेषगरी कठिन समय र अप्ठ्यारो परिस्थितिमा आफूले कस्तो निर्णय लिन्छु भन्ने कुराले आफ्नो प्रतिबद्धताको वास्तविक परीक्षा हुने बताए। सत्य र न्यायको पक्षमा दृढतापूर्वक उभिन सके मात्र आफूले व्यक्त गरेका प्रतिबद्धता व्यवहारमा प्रमाणित हुने उनको भनाइ थियो।

सभापतिको जिम्मेवारी सामान्य नभएको उल्लेख गर्दै थापाले यस पदसँग अनेक दायित्व जोडिएर आउने बताए। आफूले सभापतिको पदलाई शक्तिको प्रदर्शन वा अहंकार गर्ने अवसरका रूपमा नलिएको स्पष्ट पार्दै उनले नागरिकप्रतिको जिम्मेवारी पूरा गर्न यसले थप उत्तरदायी बनाएको बताए।

‘यो जिम्मेवारीले मलाई नागरिकहरूप्रतिको दायित्व पूरा गर्नका लागि जमिनमै उभ्याएको छ। यसले मलाई अहंकारको श्रीपेच लगाइदिएको होइन,’ उनले भने।

थापाले नेपाली कांग्रेसको लोकतान्त्रिक विरासतको संरक्षण गर्नु पनि आफ्नो महत्त्वपूर्ण जिम्मेवारी भएको बताए। पार्टीसँग जोडिएको लोकतान्त्रिक इतिहास र मूल्य–मान्यतालाई जोगाउँदै नागरिकप्रतिको दायित्व पूरा गर्नुपर्नेमा उनले जोड दिए।

उनको भनाइले सभापतिको जिम्मेवारीलाई पद र प्रतिष्ठाभन्दा पनि काम, निर्णय, जवाफदेहिता तथा लोकतान्त्रिक मूल्यप्रतिको प्रतिबद्धतासँग जोडेर हेर्नुपर्ने सन्देश दिएको छ।