नाना पाटेकरको निधन प्राकृतिक : पोस्टमार्टम रिपोर्ट

बलिउड अभिनेता नाना पाटेकरको निधनपछि मृत्युको कारण पत्ता लगाउन गोवाको बाम्बोलिमस्थित गोवा मेडिकल कलेजमा पोस्टमार्टम गरिएको छ। पोस्टमार्टम रिपोर्टले उनको मृत्यु कोरोनरी आर्टरी डिजिजका कारण भएको तीव्र हृदयाघातबाट भएको पुष्टि गरेको छ।

रिपोर्टअनुसार मुटुको मुख्य धमनीमा रगतको ढिक्का जमेपछि मुटुको ठूलो भागमा रक्तसञ्चार अवरुद्ध भएको थियो। चिकित्सकहरूले उनको मृत्यु प्राकृतिक कारणले भएको निष्कर्ष निकालेका छन्।

पाटेकरको निधनपछि पणजी प्रहरीले कानुनी प्रक्रियाअनुसार आकस्मिक मृत्युको मुद्दा दर्ता गरेको थियो। पोस्टमार्टमपछि उनको पार्थिव शरीर परिवारलाई बुझाइएको थियो। त्यसपछि पुणेमा उनको अन्त्येष्टि गरिएको भारतीय सञ्चारमाध्यमले जनाएका छन्।

विज्ञापन

निधनअघि साथीलाई पठाएका थिए सन्देश

प्रहरी अनुसन्धानका क्रममा पाटेकरले निधन हुनुभन्दा केही घण्टाअघि आफ्ना निकट साथी अमेय नाइकलाई सन्देश पठाएको खुलेको छ।

अक्टोबर ८ को बिहान करिब २ः३० बजे उनले ह्वाट्सएपमार्फत आफ्नो स्वास्थ्य ठीक नभएको जानकारी गराएका थिए। त्यसपछि उनले साथीलाई फोनसमेत गरेका थिए।

प्रहरीका अनुसार अमेयले बिहान करिब ३ः३० बजे सन्देश हेरेपछि गोवाको डोना पाउला क्षेत्रमा रहेको पाटेकरको निवास पुगेका थिए। त्यहाँ पुग्दा उनले पाटेकरलाई सोफामा अचेत अवस्थामा फेला पारेका थिए।

त्यसपछि सुरक्षा गार्डको सहयोगमा उनलाई अस्पताल पुर्‍याइएको थियो। तर, अस्पतालका चिकित्सकले उनलाई मृत घोषणा गरेका थिए।

प्रहरीले दर्ता गरेको थियो आकस्मिक मृत्युको मुद्दा

पाटेकरको मृत्युको कारण पत्ता लगाउन अक्टोबर ८ मा गोवाको बाम्बोलिमस्थित गोवा मेडिकल कलेजमा पोस्टमार्टम गरिएको थियो।

उनको निधनपछि पणजी प्रहरीले भारतीय नागरिक सुरक्षा संहिता (बीएनएसएस), २०२३ को धारा १९४ अन्तर्गत आकस्मिक मृत्युको मुद्दा दर्ता गरेको थियो। अस्पतालमा उनलाई मृत अवस्थामा ल्याइएको जानकारी प्राप्त भएपछि कानुनी प्रक्रियाअनुसार अनुसन्धान अघि बढाइएको प्रहरीले जनाएको थियो।

पोस्टमार्टमपछि पाटेकरको पार्थिव शरीर पुणे लगिएको थियो। त्यहाँ डोन्जे गाउँस्थित फार्महाउसमा राजकीय सम्मानका साथ उनको अन्त्येष्टि गरिएको थियो।