आजदेखि खुल्यो दसैँको अग्रीम टिकट बुकिङ, नयाँ बसपार्कमा रातिदेखि नै यात्रुको लाइन

सरकारले दसैँमा घर जाने यात्रुका लागि आजदेखि अग्रीम बस टिकट बुकिङ खुला गरेको छ।

टिकट काट्नका लागि बिहीबार रातिदेखि नै यात्रुहरू काठमाडौंको नयाँ बसपार्कस्थित टिकट काउन्टर अगाडि लाइनमा बसेका छन्। सरकारले दसैँमा घर जानका लागि आज (शुक्रबार)देखि अग्रीम बस टिकट खुला गर्ने निर्णय गरेको थियो।

यातायात व्यवस्था विभाग, नेपाल प्रहरी र यातायात व्यवसायी तथा मजदुरबीच यही असोज २० गते मङ्गलबार विभागमा बसेको बैठकले असोज २३ गतेदेखि दसैँका लागि अग्रीम टिकट बुकिङ खुला गर्ने निर्णय गरेको थियो।

विज्ञापन

नयाँबसपार्क सञ्चालन गर्दै आएको लोत्से बहुउद्देश्यीय प्रालिका महाप्रबन्धक पङ्कज मल्लले बिहीबार राति ९ः०० बजेदेखि टिकट लिनका लागि यात्रुले लाइन बस्न सुरु गरेको जानकारी दिए।

मल्लले बझाङ, बाजुरा र धनगढी जाने यात्रु बिहीबार रातिदेखि नै नयाँबसपार्कमा आएर टिकटको लाइनमा बसेको बताए। दसैँको अग्रीम टिकट बुकिङका लागि लोत्से बहुउद्देश्यीय प्रालिले नयाँ बसपार्कमा १५ टिकट काउन्टर थप गरेको छ।