ट्रम्पको ‘ऊर्जा यु`द्धविराम’लाई जेलेन्स्कीको समर्थन, तर राखे यस्तो सर्त

युक्रेनी राष्ट्रपति भोलोदिमिर जेलेन्स्कीले अमेरिकी राष्ट्रपति डोनाल्ड ट्रम्पले रूस र युक्रेनबिच ऊर्जा पूर्वाधारमा आक्रमण रोक्ने सहमति भएको घोषणा गरेपछि त्यसलाई समर्थन गरेका छन्।

तर उनले रूसले पनि युद्धविरामप्रति प्रतिबद्धता देखाउनुपर्ने बताए। जेलेन्स्कीले युद्धविरामको घोषणा मात्र पर्याप्त नहुने र त्यसलाई दुवै पक्षले कार्यान्वयन गर्नुपर्नेमा जोड दिएका हुन्।

जेलेन्स्कीले आइतबार सामाजिक सञ्जाल एक्समा क्यानडाका प्रधानमन्त्री मार्क कार्नी, फिनल्यान्डका राष्ट्रपति अलेक्जेन्डर स्टब र नेटोका महासचिव मार्क रुटेसँग यस विषयमा कुराकानी गरेको जानकारी दिएका छन्। उनीहरूबिच ट्रम्पले घोषणा गरेको ऊर्जा युद्धविराम र त्यसलाई अघि बढाउने विषयमा छलफल भएको थियो।

विज्ञापन

जेलेन्स्कीका अनुसार युक्रेन ऊर्जा युद्धविरामको पक्षमा छ र तनाव कम गर्ने प्रयासलाई समर्थन गर्छ। उनले अमेरिकी पक्षबाट सहमतिबारे थप विवरण आउने प्रतीक्षा गरिरहेको पनि बताए। उनले मानिसको जीवन रक्षा गर्ने, युद्धको जोखिम घटाउने र अन्ततः युद्ध अन्त्य गरी स्थायी शान्ति कायम गर्ने उद्देश्यले अघि सारिएका कदमलाई युक्रेनले पूर्ण समर्थन गर्ने बताएका छन्।

अमेरिकी राष्ट्रपति ट्रम्पले आइतबार आफ्नो सामाजिक सञ्जाल ट्रुथ सोसलमा रूस र युक्रेनबिच तत्काल लागू हुने ऊर्जा युद्धविराममा सहमति भएको दाबी गरेका थिए। उनले दुवै पक्ष यसमा सहमत भएको उल्लेख गर्दै सहमति नतोड्न आग्रह गरेका थिए। तर ट्रम्पले युद्धविराम कति समयका लागि लागू हुने, कुन-कुन ऊर्जा पूर्वाधारलाई लक्षित आक्रमणबाट जोगाइने र सहमति कार्यान्वयन कसरी गरिने भन्नेबारे विस्तृत जानकारी दिएका छैनन्।

यो पनि पढ्नुहोस्

रूस-युक्रेनबिच ‘ऊर्जा यु`द्धविराम’ भएको ट्रम्पको घोषणा

ट्रम्पको घोषणापछि युक्रेनले समर्थन जनाए पनि रूसले सहमति स्वीकार गरेको वा त्यसअनुसार आक्रमण रोक्न प्रतिबद्धता जनाएको स्पष्ट पुष्टि भएको छैन। त्यसैले युद्धविरामको वास्तविक अवस्था र त्यसको कार्यान्वयनबारे अझै प्रश्न बाँकी छन्। जेलेन्स्कीले पनि अमेरिकी पक्षबाट थप विवरण आएपछि मात्रै सहमतिका सर्तबारे स्पष्ट हुने संकेत गरेका छन्।

यसअघि जेलेन्स्कीले रूसले युक्रेनको ऊर्जा पूर्वाधारमा आक्रमण रोक्ने हो भने युक्रेन पनि रूसका तेल प्रशोधन केन्द्रमा आक्रमण रोक्न तयार रहेको बताएका थिए। रूसले युक्रेनका ऊर्जा केन्द्रमा आक्रमण गर्दा विद्युत् आपूर्ति र सर्वसाधारणको दैनिक जीवनमा असर पर्ने गरेको युक्रेनको भनाइ छ। त्यसैले ऊर्जा पूर्वाधारलाई निशाना नबनाउने सहमतिले युद्धका कारण सर्वसाधारणले भोगिरहेको जोखिम घटाउन सक्ने अपेक्षा गरिएको छ।

उनको पछिल्लो भनाइले युक्रेन ऊर्जा युद्धविरामका लागि तयार रहेको देखाए पनि उनले रूसबाट पनि उस्तै प्रतिबद्धता चाहन्छन्। अब अमेरिकी पक्षले सहमतिका विस्तृत सर्त सार्वजनिक गर्छ कि गर्दैन र रूसले त्यसलाई स्वीकार गरेर कार्यान्वयन गर्छ कि गर्दैन भन्ने विषय महत्त्वपूर्ण हुनेछ। यी विषय स्पष्ट नभएसम्म ट्रम्पले घोषणा गरेको युद्धविराम कति प्रभावकारी हुन्छ भन्ने निश्चित हुन सकेको छैन।