आईसीसी क्रिकेट विश्वकप लिग-२ को अंकतालिकामा नेपाल शीर्ष चारमा नरहने निश्चित भएको छ। शुक्रबार ओमानले क्यानडालाई पराजित गरेसँगै नेपालको शीर्ष चारमा पुग्ने सम्भावना समाप्त भएको हो।
यससँगै नेपालले अब लिग-२ बाट सिधै विश्वकप छनोटमा स्थान बनाउन नसक्ने भएको छ। नेपाली टोलीले विश्वकप छनोटसम्म पुग्न प्लेअफको बाटो अपनाउनुपर्नेछ।
ओमानले क्यानडालाई हराएपछि २९ खेलबाट ३३ अंक जोडेको छ। नेपाल भने ३२ खेलमा २४ अंकसहित तालिकाको सातौँ स्थानमा छ। नेपालले बाँकी सबै खेल जिते पनि अधिकतम ३२ अंक मात्रै जोड्न सक्ने भएकाले शीर्ष चारमा पुग्ने सम्भावना समाप्त भएको हो।
लिग-२ को शीर्ष तीन स्थानमा रहेका टोलीको टुङ्गो यसअघि नै लागिसकेको छ। अमेरिका ३४ खेलबाट ४७ अंक जोड्दै च्याम्पियन बनिसकेको छ। स्कटल्यान्ड ३६ खेलमा ४५ अंकसहित दोस्रो र नेदरल्यान्ड्स ३२ खेलबाट ३८ अंकसहित तेस्रो स्थानमा छन्।
अंकतालिकामा ओमान २९ खेलबाट ३३ अंकसहित चौथो स्थानमा छ। नामिबिया ३४ खेलमा २९ अंकसहित पाँचौँ र क्यानडा ३३ खेलबाट २५ अंकसहित छैटौँ स्थानमा छन्। नेपाल २४ अंकसहित सातौँ तथा यूएई ३० खेलबाट १९ अंक जोडेर आठौँ स्थानमा छन्।
हाल अमेरिका, नामिबिया र यूएईबीचको शृङ्खला पनि जारी छ। शुक्रबार राति नामिबिया र यूएईबीच खेल हुँदै छ।
नेपालले भने आइतबार क्यानडासँग प्रतिस्पर्धा गर्नेछ। शीर्ष चारमा पुग्ने सम्भावना समाप्त भए पनि नेपालका लागि अब प्लेअफमार्फत विश्वकप छनोटमा स्थान बनाउने लक्ष्य महत्त्वपूर्ण बनेको छ।
प्रतिक्रियाहरू
कृपया सभ्य र मर्यादित भाषामा प्रतिक्रिया दिनुहोस्। अपमानजनक, मानहानिकारक वा घृणा फैलाउने प्रतिक्रियाहरू हटाइनेछन्।
अहिलेसम्म कुनै प्रतिक्रिया छैन। आफ्नो विचार राख्ने पहिलो व्यक्ति बन्नुहोस्।