काठमाडौंको कपनस्थित बाल उद्धार माध्यमिक विद्यालयका प्रधानाध्यापकमाथि कुटपिट तथा शिक्षिकामाथि दुर्व्यवहार गरेको आरोपमा प्रहरीले दुई जनालाई पक्राउ गरेको छ।
पक्राउ पर्नेहरूमा सुनसरीको वराहक्षेत्र नगरपालिका-७ घर भई कपन बस्ने ३६ वर्षीय निशाल दाहाल र सिन्धुलीको दुधौली नगरपालिका-१ घर भई कपनमै बस्ने ४४ वर्षीय ध्रुव प्रसाद घिमिरे रहेका छन्।
प्रहरीका अनुसार बिहीबार बिहान अन्दाजी १०:३४ बजे बुढानिलकण्ठ नगरपालिका-१० स्थित विद्यालय प्राङ्गणमा शिक्षकमाथि कुटपिट भएको सूचना पाएपछि प्रहरी वृत्त बौद्धको टोली घटनास्थल पुगेको थियो।
जाँचका क्रममा दाहालले विद्यालयमा कार्यरत महिला शिक्षिकालाई अपशब्द तथा अश्लील शब्द प्रयोग गरी गालीगलौज, धाकधम्की र अभद्र व्यवहार गरेको पाइएको प्रहरीले जनाएको छ।
सोही क्रममा घिमिरेको निर्देशनमा प्रधानाध्यापकमाथि मुक्का र लात्ती प्रहार गरी कुटपिट गरिएको थियो।
घटनापछि नियन्त्रणमा लिइएका दुवै जनाविरुद्ध ‘अभद्र व्यवहार गर्नु नहुने’ कसुरमा जिल्ला प्रशासन कार्यालय काठमाडौंबाट ४ दिनको म्याद थप गरी अनुसन्धान अघि बढाइएको प्रहरीले जनाएको छ।
प्रतिक्रियाहरू
कृपया सभ्य र मर्यादित भाषामा प्रतिक्रिया दिनुहोस्। अपमानजनक, मानहानिकारक वा घृणा फैलाउने प्रतिक्रियाहरू हटाइनेछन्।
अहिलेसम्म कुनै प्रतिक्रिया छैन। आफ्नो विचार राख्ने पहिलो व्यक्ति बन्नुहोस्।