सलमानबारे बिश्नोई समूहको अर्को अडियो सार्वजनिक, टाइगरको घटनापछि दिशाको घरमा सुरक्षा कडा

मुम्बईमा अभिनेता टाइगर श्राफ सवार कारमा गोली चलेको घटनापछि अभिनेता सलमान खानलाई धम्की दिइएको भनिएको अर्को अडियो सार्वजनिक भएको छ।

अडियोमा अनिल पण्डित नामका व्यक्तिले आफूसँग ७० हजार शूटर रहेको दाबी गर्दै सलमानले जेलमा रहेका लरेन्स बिश्नोई र बिश्नोई समुदायसँग माफी नमागे उनका नजिकका मानिसहरूलाई निशाना बनाउने चेतावनी दिएका छन्। उनले सलमानको जीवन कठिन बनाउने धम्कीसमेत दिएको भारतीय सञ्चारमाध्यमले जनाएका छन्। यद्यपि, अडियोको सत्यता र त्यसमा गरिएका दाबी स्वतन्त्र रूपमा पुष्टि भएका छैनन्।

अडियोमा दिवंगत अभिनेता सुशान्त सिंह राजपूतको मृत्युलाई लिएर पनि आरोप लगाइएको छ। यसअघि पनि सलमानलाई लक्षित गरिएको भनिएको अर्को अडियो सार्वजनिक भएको थियो। आइतबार साँझ मुम्बईको जुहू क्षेत्रमा टाइगर श्राफ सवार बीएमडब्ल्यू कारमा मोटरसाइकलमा आएका तीन जनाले गोली चलाएको आरोप छ। घटनामा टाइगरलाई चोट लागेन भने उनका चालक र अर्का एक व्यक्ति घाइते भए।

विज्ञापन

घटनामा संलग्न भएको आशंकामा एक नाबालिगसहित तीन जनालाई राजस्थानको कोटा रेलवे स्टेसनबाट पक्राउ गरिएको छ। प्रहरीका अनुसार उनीहरू दिल्ली हुँदै नेपाल भाग्ने प्रयासमा थिए। पक्राउ परेकामध्ये एक जना अनिल पण्डितको सम्पर्कमा रहेको बताइएको छ। उनीहरूलाई थप अनुसन्धानका लागि मुम्बई प्रहरीको जिम्मा लगाइएको छ।

यसैबिच, घटनापछि उत्तर प्रदेशको बरेलीस्थित अभिनेत्री दिशा पटानीको घरमा पनि सुरक्षा व्यवस्था कडा पारिएको छ। सोमबार डिएसपी आशुतोष शिवम र कोतवालीका प्रहरी निरीक्षक राजीव कुमारले घरको सुरक्षा व्यवस्थाको निरीक्षण गरेका छन्। उनीहरूले ड्युटीमा रहेका प्रहरीलाई सतर्क रहन र आसपासका गतिविधिमा निगरानी बढाउन निर्देशन दिएका छन्। दिशाको घरमा यसअघि नै एक हेड कन्स्टेबल र तीन कन्स्टेबल खटिएका थिए।

दिशाको बरेलीस्थित घरमा गत वर्ष सेप्टेम्बर ११ र १२ मा पनि गोली चलेको थियो। उक्त घटनापछि घरको सुरक्षा बढाइएको थियो भने दुई जना संदिग्ध पक्राउ परेका थिए। अहिले उनका बुबा जगदीश सिंह पटानी र बहिनी खुश्बु पटानी उक्त घरमा बस्दै आएका छन्। प्रहरीले परिवारको सुरक्षामा निरन्तर निगरानी राखिरहेको जनाएको छ।