थप पाँच जना प्रस्तावित राजदूतको सुनुवाइ आज

सङ्घीय संसद्को संसदीय सुनुवाइ समिति (संयुक्त) ले आज (मंगलबार) थप पाँच जना प्रस्तावित राजदूतहरूको सुनुवाइ हुने भएको छ।

आज बिहान ९ः३० बजे बस्ने बैठकमा जर्मनीका लागि राजदूत पदमा प्रस्तावित सरू जोशी, इजरायलका लागि राजदूत पदमा प्रस्तावित सुरेशकुमार कर्ण, ओमानका लागि राजदूत पदमा प्रस्तावित पदमाक्षी राणा, कोरियाका लागि राजदूत पदमा प्रस्तावित प्रा डा सङ्गम श्रेष्ठ र स्पेनका लागि राजदूत पदमा प्रस्तावित प्राप्ति शेरचनको सुनुवाइ गर्ने जनाएको छ।

यसअघि, समितिले विभिन्न चार मुलुकका लागि राजदूत पदमा नियुक्तिका लागि प्रस्तावितहरूको सुनुवाइ सम्पन्न गरेको थियो। समितिका सभापति बोधनारायण श्रेष्ठको अध्यक्षमा सोमबार बसेको बैठकले भारतका लागि प्रस्तावित डा निश्चलनाथ पाण्डे, चीनका लागि प्रस्तावित कल्याणराज शर्मा, संयुक्त राज्य अमेरिकाका लागि प्रस्तावित चरिनजङ्ग थापा र संयुक्त अधिराज्यका लागि राजदूत पदमा प्रस्तावित गौरव शमशेर जबराको सुनुवाइ सम्पन्न गरेको थियो।

विज्ञापन

बैठकमा प्रस्तावित चारै जना राजदूतले आ–आफ्नो कार्ययोजना प्रस्तुत गरेका थिए भने सांसदहरूले जिज्ञासा राख्दै प्रतिप्रश्न गरेका थिए। सो अवसरमा प्रस्तावित राजदूतहरूले सम्बन्धित मुलुकसँग नेपालको कूटनीतिक सम्बन्ध थप सुदृढ गर्ने, द्विपक्षीय सम्बन्ध विस्तार गर्ने, द्विपक्षीय संयन्त्रको क्रियाशीलता बढाउने, द्विपक्षीय व्यापार र कनेक्टिभिटी सुधारलगायत विषयमा पहल गर्नका लागि आफ्ना योजना प्रस्तुत गरेका थिए।

त्यसअघि बैठकले प्रस्तावित राजदूतउपर प्राप्त उजुरीकर्ताका उजुरी सुनुवाइ गरेको थियो।