गंगामा डुंगा दुर्घटना हुँदा १३ बालबालिकाको ज्यान गयो

भारतको बिहारस्थित वैशाली जिल्लाको राघोपुर क्षेत्रमा मंगलबार राति गंगा नदीमा डुंगा पल्टिँदा १३ बालबालिकाको ज्यान गएको छ।

भारतीय सञ्चारमाध्यमका अनुसार डुंगामा सवार अन्य सात जनालाई उद्धार गरी अस्पताल भर्ना गरिएको छ र उनीहरू खतरामुक्त छन्। स्थानीयले बालबालिका छिमेकी गाउँमा भोजमा सहभागी हुन जाँदै गरेको जानकारी दिए।

डुंगामा करिब १५ देखि २० जना सवार थिए। दुर्घटनामा परेका सबै बालबालिका १५ वर्ष वा सोभन्दा कम उमेरका रहेको जिल्ला मजिस्ट्रेट वर्षा सिंहले बताइन्। उद्धार गरिएका सातै जनाको पटनास्थित नालन्दा मेडिकल कलेज तथा अस्पतालमा उपचार भइरहेको छ।

विज्ञापन

बेपत्ता भएकाहरूको खोजी गर्न बुधबार बिहानदेखि उद्धार कार्य पुनः सुरु गरिएको छ।

डुंगा पुरानो र पहिले नै चिरा परेको भए पनि मर्मत वा अर्को डुंगाको व्यवस्था गर्न प्रशासनले ध्यान नदिएको आरोप स्थानीयले लगाएका छन्। उनीहरूले उद्धारमा ढिलाइ भएको र अस्पतालमा पनि पर्याप्त सुविधा नभएको गुनासो समेत गरे। घटनापछि स्थानीयले जिल्ला प्रशासनविरुद्ध नाराबाजीसमेत गरेका छन्।

बिहारका मुख्यमन्त्री सम्राट चौधरीले घटनाप्रति दुःख व्यक्त गर्दै मृतकका प्रत्येक परिवारलाई चार लाख भारतीय रुपैयाँ सहयोग दिने घोषणा गरेका छन्। प्रधानमन्त्री नरेन्द्र मोदीले पनि मृतकका प्रत्येक परिवारलाई प्रधानमन्त्री राष्ट्रिय राहत कोषबाट दुई लाख भारतीय रुपैयाँ र घाइतेलाई ५० हजार रुपैयाँ दिने घोषणा गरेका छन्।

बिहार विधानसभामा विपक्षी दलका नेता तेजस्वी यादवले पनि घटनाप्रति दुःख व्यक्त गरेका छन्। उनले प्रभावित परिवारलाई भेट्न घटनास्थल जाने बताएका छन्।

दुर्घटनामा ज्यान गुमाउने बालबालिकामा मीरा कुमारी, निशु कुमारी, अनिशा कुमारी, सुनीता कुमारी, आर्यन कुमार, मोहन कुमार, अमृता कुमारी, अंकिता कुमारी, पिंकी कुमारी, नमन कुमार, सिन्की कुमारी, भोनु कुमारी र सोनम कुमारी रहेका छन्।