७५ वर्षीय पुरुषले गरे ३० वर्षीया युवतीसँग इन्गेजमेन्ट, ४५ वर्षको उमेर अन्तरले तात्यो सञ्जाल

भारतको उत्तर प्रदेशस्थित औरैया जिल्लामा ७५ वर्षीय रामसुगर र ३० वर्षीया इन्फ्लुएन्सर रीना राजपूतले इन्गेजमेन्ट गरेका छन्। उनीहरूबिच ४५ वर्षको उमेर अन्तर छ। टाइम्स अफ इन्डियाका अनुसार यो जोडी अब विवाहको तयारीमा छ।

रामसुगर औरैयाको अरियारी गाउँका बासिन्दा हुन् भने रीना दयालपुर क्षेत्रमा बस्छिन्। उनीहरूले करिब एक साताअघि औरैयाको एक ब्युटी पार्लरमा औंठी साटासाट गरेका थिए। रीनाका अनुसार नवरात्रपछि विवाहको मिति तय गरिनेछ।

रीना आफूहरूबिचको ४५ वर्षको उमेर अन्तरलाई लिएर असहज नभएको बताउँछिन्। प्रेममा उमेरले फरक पार्दैन र उनीहरू दुवै नयाँ जीवन सुरु गर्न तयार रहेको उनको भनाइ छ।

विज्ञापन

रामसुगरका अनुसार रीना करिब दुई वर्षदेखि उनको घरमा आउजाउ गर्दै आएकी थिइन्। रामसुगरकी छोरी राधा युट्युबका लागि भिडियो सामग्री बनाउँछिन्। राधाकी आमाको करिब सात वर्षअघि मृत्यु भएको थियो। त्यसपछि भिडियो सामग्री बनाउने क्रममा रीना उनीहरूको घरमा नियमित आउन थालेकी थिइन्। यही क्रममा रीना र रामसुगरबिच नजिकको सम्बन्ध विकास भएको राधाले बताएकी छन्।

उनीहरूको इन्गेजमेन्टको भिडियो इन्स्टाग्राममा सार्वजनिक भएपछि सामाजिक सञ्जालमा मिश्रित प्रतिक्रिया आएका छन्। केहीले उमेरको अन्तरभन्दा प्रेमलाई महत्त्व दिनुपर्ने भन्दै जोडीलाई बधाई दिएका छन्। तर केहीले यो सम्बन्ध अनलाइनमा चर्चा र लोकप्रियता बढाउन गरिएको प्रचार मात्रै हो कि भनेर प्रश्न उठाएका छन्। यद्यपि, प्रचारका लागि सम्बन्ध सार्वजनिक गरिएको भन्ने दाबी पुष्टि भएको छैन।

यो जोडीको विवाहको मिति भने तय भइसकेको छैन। उमेरको ठुलो अन्तर र सामाजिक सञ्जालमा सार्वजनिक भएको इन्गेजमेन्टका कारण उनीहरूको सम्बन्ध अहिले चर्चामा छ।