अर्बपति रोनाल्डोलाई २८५ डलर जरिवाना, किन गरियो कारबाही ?

पोर्चुगलका स्टार फुटबलर क्रिस्टियानो रोनाल्डोलाई राष्ट्रिय टोलीको क्याम्प छाडेको भन्दै पोर्चुगिज फुटबल महासंघले २५५ युरो (करिब २८५ डलर) जरिवाना र ३० दिनको प्रतिबन्ध लगाएको छ।

करोडौं डलर कमाउने रोनाल्डोका लागि यो जरिवाना उनको आम्दानीको तुलनामा निकै सानो रकम हो।

४१ वर्षीय रोनाल्डोले प्रशिक्षक जर्ज जिसससँग खेलमा आफ्नो भूमिकालाई लिएर विवाद भएपछि डेनमार्कमा रहेको राष्ट्रिय टोलीको क्याम्प छाडेका थिए। नर्वेविरुद्धको खेलमा मैदान उत्रन नपाएपछि उनले प्रशिक्षकले आफूलाई ३० मिनेट खेलाउने वाचा गरेको तर पूरा नगरेको आरोप लगाएका थिए।

विज्ञापन

रोनाल्डोका अनुसार प्रशिक्षकले सुरुमा उनलाई खेलमा सहभागी गराउने योजना सुनाएका थिए। तर, नर्वेविरुद्धको खेलमा उनलाई मैदानमा उतारिएन। त्यसपछि प्रशिक्षकसँगको छलफलमा पनि सहमति कार्यान्वयन नभएको भन्दै उनले टोली छाड्ने निर्णय गरे।

महासंघको अनुशासन परिषद्ले रोनाल्डोले नियतवश अनुशासन उल्लंघन गरेको ठहर गर्दै सोमबार उक्त सजाय सुनाएको हो। महासंघले उनको गल्तीलाई गम्भीर माने पनि स्वीकारोक्ति र यसअघिको स्वच्छ अनुशासनात्मक रेकर्डलाई सजाय निर्धारण गर्दा ध्यान दिएको जनाएको छ।

रोनाल्डोले यसअघि नै राष्ट्रिय टोलीको क्याम्प छाडेकोमा सहकर्मी र समर्थकसँग माफी मागेका थिए। उनले आफ्नो व्यवहारको जिम्मेवारी लिँदै सजाय भोग्न तयार रहेको र प्रतिबन्ध सकिएपछि राष्ट्रिय टोलीका लागि खेल्न तयार हुने बताएका थिए।

फोर्ब्सका अनुसार रोनाल्डोको अनुमानित वार्षिक आम्दानी ३० करोड डलर र कुल सम्पत्ति एक अर्ब २० करोड डलर छ। उनको आम्दानीको ठुलो हिस्सा साउदी अरेबियाको क्लब अल नासरसँगको सम्झौताबाट आउँछ। त्यसबाहेक विज्ञापन, स्पोन्सर र अन्य व्यावसायिक गतिविधिबाट पनि उनले ठुलो रकम कमाउँछन्।

यति ठुलो आम्दानी भएका रोनाल्डोले तिर्नुपर्ने जरिवाना २८५ डलर मात्रै हो। उनको अनुमानित वार्षिक आम्दानीलाई आधार मान्दा यो रकम उनले केही सेकेन्डमै कमाउन सक्ने रकम बराबर हुन्छ।

यस घटनाका बाबजुद पोर्चुगिज फुटबल महासंघका अध्यक्ष पेड्रो प्रोएन्काले रोनाल्डो राष्ट्रिय टोलीमा फर्किएको हेर्न आफूहरू इच्छुक रहेको बताएका छन्। प्रतिबन्ध कुन खेलमा लागू हुने र यसअघि बिताएको निलम्बन अवधि ३० दिनमा गणना हुने वा नहुनेबारे भने महासंघले स्पष्ट पारेको छैन।