एमाले केन्द्रीय कार्यालयबाट हटाइए सुरक्षाकर्मी, आचार्य भन्छन्: सरकारबाट औपचारिक जानकारी आएको छैन

सरकारले नेकपा एमालेको केन्द्रीय कार्यालयको सुरक्षामा खटिएका सशस्त्र प्रहरीलाई फिर्ता बोलाएको छ। सोमबारदेखि कार्यालयमा सुरक्षाका लागि खटिएका सबै सुरक्षाकर्मी हटाइएको एमालेले जनाएको छ।

एमाले प्रचार विभाग प्रमुख नीरज आचार्यका अनुसार सरकारले कार्यालयको सुरक्षामा खटिएका सुरक्षाकर्मी फिर्ता भएपनि कुनै पत्र भने नआएको बताए। उनले भने, ‘कार्यालयलाई कुनै औपचारिक पत्र आएको छैन। ५-६ जना सुरक्षाकर्मी यहाँ खटिएका थिए । आज बिहान उनीहरू आफैं यहाँबाट हटे।’ हट्नुको कारणबारे आफूहरूलाई जानकारी नभएको उनको भनाइ छ। सरकारले पनि सुरक्षाकर्मी फिर्ता बोलाएको विषयमा कुनै जानकारी सार्वजनिक गरेको छैन।

यसअघि एमालेको केन्द्रीय कार्यालयमा सशस्त्र प्रहरीले सुरक्षा प्रदान गर्दै आएको थियो। सरकारले एकाएक सुरक्षाकर्मी फिर्ता बोलाएपछि कार्यालयको सुरक्षा व्यवस्था कसरी मिलाउने भन्नेबारे छलफल सुरु भएको आचार्यले बताए।

विज्ञापन

एमालेको केन्द्रीय कार्यालयको सुरक्षा व्यवस्थामा गरिएको यो परिवर्तनसँगै सरकारले राजनीतिक दलका कार्यालयमा उपलब्ध गराउँदै आएको सुरक्षा व्यवस्थाबारे पनि प्रश्न उठेको छ।