उत्तर कोरियाले सीमामा सियोलविरोधी प्रचार प्रसारण थाल्ने

उत्तर कोरियाले दक्षिण कोरियासँगको सीमामा सियोलविरोधी प्रचार प्रसारण पुनः सुरु गर्ने घोषणा गरेको छ। नेता किम जोङ उनकी बहिनी किम यो जोङले सीमामा सैनिक किल्ला निर्माण र बारुदी सुरुङ विस्फोटलाई लिएर तनाव बढिरहेका बेला यस्तो घोषणा गरेका हुन्।

किम यो जोङले बिहीबार जारी वक्तव्यमा केही दिनभित्रै सीमामा लाउडस्पीकर तयारी अवस्थामा राखिने र अक्टोबरभित्रै मनोवैज्ञानिक युद्धका लागि सञ्चालन गरिने बताए। दक्षिण कोरियाले उक्साहट गरे कडा प्रतिकार गर्ने चेतावनी दिँदै उनले आफ्ना दाजुको सीमालाई अभेद्य बनाउने नीतिलाई समर्थन गरे।

उत्तर कोरियाले सीमामा बारुदी सुरुङ, काँडेतार र ट्याङ्क रोक्ने अवरोध थपिरहेको छ। सेप्टेम्बर २१ मा भएको सीमा विस्फोटका लागि दक्षिण कोरियाले उत्तरले बिछ्याएका सुरुङलाई जिम्मेवार ठहर गर्दै माफी माग्न र बाँकी सुरुङ हटाउन आग्रह गरेको थियो। तर प्योङयाङले संलग्नता अस्वीकार गर्दै आएको छ।

विज्ञापन

दक्षिण कोरियाली सेनाका अनुसार उत्तर कोरियाली सैनिकले यस वर्ष किल्ला निर्माणका क्रममा ५० पटक सीमारेखा पार गरेका छन्। दक्षिण कोरियाले चेतावनी गोली चलाउनुका साथै लाउडस्पीकरबाट प्रसारण गरेको जनाएको छ। उत्तर कोरियाले भने सीमा उल्लङ्घनको आरोप अस्वीकार गरेको छ।

दक्षिण कोरियाली रक्षा मन्त्रालयका प्रवक्ता चुङ बिन्नाले उत्तर कोरियाको गतिविधिको जवाफमा अनुपातिक कदम चालिने बताए। संयुक्त सेना प्रमुख जिन योङ–सुङले पनि उत्तर कोरियाबाट हुन सक्ने उक्साहटको कडा जवाफ दिन सेनालाई निर्देशन दिएका छन्।

शीतयुद्धकालीन मनोवैज्ञानिक युद्धको माध्यम मानिने लाउडस्पीकर प्रसारण दुवै कोरियाले विगतमा तनावका बेला प्रयोग गर्दै आएका छन्। दक्षिण कोरियाका राष्ट्रपति ली जे म्युङको सरकारले उत्तरसँग सम्बन्ध सुधार गर्ने प्रयासस्वरूप गत वर्ष सीमामा यस्तो प्रसारण रोकेको थियो। तर उत्तर कोरियाली नेता किम जोङ उनले दक्षिण कोरियासँगको कूटनीति र सहयोग अन्त्य गर्दै त्यसलाई स्थायी शत्रु घोषणा गर्नुभएको छ। अमेरिकासँगको आणविक वार्तामा पनि वर्षौंदेखि गतिरोध कायम छ।