नवविवाहित जोडीको रहस्यमय मृ'त्यु, खुट्टा साङ्लोले बाँधिएको अवस्थामा शव फेला

भारतको महाराष्ट्रस्थित धुले जिल्लाको तापी नदीमा नवविवाहित जोडी फेला परेको छ। उनीहरूको एकअर्काको खुट्टा फलामको साङ्लोले बाँधेर तालाले बन्द गरिएको अवस्थामा भेटिएको हो।

भारतीय सञ्चारमाध्यमका अनुसार ३५ वर्षका श्याम हरि पाटिल र उनकी १९ वर्षीया श्रीमती सपना पाटिल जलगाउँ जिल्लाको अमलनेर क्षेत्रका बासिन्दा थिए। उनीहरूको करिब चार महिनाअघि विवाह भएको थियो। उनीहरू धुले जिल्लाको सावलदे क्षेत्रनजिकै नदीमा फेला परेका हुन्।

प्रहरीका अनुसार, श्यामको एउटा खुट्टा र सपनाको एउटा खुट्टा फलामको साङ्लोले बाँधेर तालाले बन्द गरिएको थियो। घटनाबारे जानकारी पाएपछि प्रहरी घटनास्थल पुगेको थियो। प्रहरीले दुवैको शव पोस्टमार्टमका लागि पठाएको छ।

विज्ञापन

स्थानीय बासिन्दाले गत बुधबार दिउँसोदेखि नै नदी नजिकै एउटा मोटरसाइकल पार्क गरिएको देखेका थिए। बिहीबार दिउँसो करिब साढे १२ बजे नदीमा दुई जनालाई देखेपछि स्थानीयले प्रहरीलाई खबर गरेका थिए। मोटरसाइकलको नम्बरका आधारमा प्रहरीले उनीहरूको पहिचान गरेको थियो।

प्रहरीका अनुसार, श्यामले बुधबार बिहान करिब १ बजे आफ्नो सालोलाई फोन गरेका थिए। फोन बन्द गर्नुअघि उनले ‘सबै कुरा सकियो’ र ‘म जाँदै छु’ भनेका थिए। त्यसपछि उनका सालोले पटक-पटक फोन गर्दा पनि सम्पर्क हुन सकेन।

नरदाना प्रहरीका सहायक निरीक्षक सचिन कपाडनिसका अनुसार, फोन संवाद र घटनास्थलमा भेटिएका परिस्थितिका आधारमा प्रहरीले उनीहरूको घटनालाई आत्महत्याको आशंकासँग जोडेर अनुसन्धान गरिरहेको छ। तर आत्महत्या वा हत्या के भएको हो भन्नेबारे प्रहरीले अन्तिम निष्कर्ष निकालेको छैन।

श्याम जलगाउँको एक निजी कम्पनीमा काम गर्थे। उनीहरूको विवाह भएको करिब चार महिना मात्रै भएको थियो। प्रहरीले पोस्टमार्टमको नतिजा र अन्य प्रमाणका आधारमा घटनाबारे थप अनुसन्धान गरिरहेको जनाएको छ।