मोरङको सुन्दरहरैँचा नगरपालिका-१० विराटचोकमा शुक्रबार राति विद्युत् सर्ट भएर आगलागी हुँदा १३ लाख रुपैयाँ बराबरको धनमाल जलेर नष्ट भएको छ।
प्रहरीका अनुसार राति पौने ११ बजेतिर स्थानीय हस्तबहादुर थापाको टिनको छानो र इँटाको गाह्रो भएको घरमा सञ्चालित किराना पसलबाट आगलागी सुरु भएको थियो।
आगलागीबाट थापाको किराना पसलमा रहेका खाद्यान्न तथा अन्य सामग्रीमा ५ लाख र नगद १ लाख गरी ६ लाख रुपैयाँ बराबरको क्षति भएको छ।
यस्तै, सोही घरमा भाडामा सञ्चालित कमला मुदेलको कपडा पसलमा आगोको धुवाँ र तापका कारण थप ५ लाख रुपैयाँ बराबरको कपडा नष्ट भएको प्रहरीको प्रारम्भिक अनुमान छ। आगलागीबाट पसल रहेका कोठाहरूमा समेत २ लाख रुपैयाँ बराबरको भौतिक क्षति पुगेको छ।
इलाका प्रहरी कार्यालय विराटचोकको टोली, सशस्त्र प्रहरी, स्थानीय बासिन्दा तथा बेलबारी र सुन्दरहरैँचा नगरपालिकाका दमकलको संयुक्त प्रयासमा राति साढे ११ बजे आगो पूर्ण रूपमा नियन्त्रणमा लिइएको थियो।
प्रतिक्रियाहरू
कृपया सभ्य र मर्यादित भाषामा प्रतिक्रिया दिनुहोस्। अपमानजनक, मानहानिकारक वा घृणा फैलाउने प्रतिक्रियाहरू हटाइनेछन्।
अहिलेसम्म कुनै प्रतिक्रिया छैन। आफ्नो विचार राख्ने पहिलो व्यक्ति बन्नुहोस्।