बझाङमा भिरबाट लडेर वडाध्यक्ष जोशीको मृत्यु

बझाङमा भिरबाट लडेर बुंगल नगरपालिका–७ का वडाध्यक्ष टंक जोशीको मृत्यु भएको छ।

गाउँमाथि रहेको अठपाली भन्ने ठाउँमा खर काट्न गएको बेला भिरबाट लडेर चट्टानमा बजारिँदा ५० वर्षीय जोशी गम्भीर घाइते भएका थिए।

भिरबाट लडेर चट्टानमा बजारिएपछि उनको कानबाट रगत बगेको मृतकका आफन्त रामचन्द्र जोशीले बताए। गम्भीर घाइते जोशीलाई उद्धार गरी अस्पताल पुर्‍याउन हेलिकोप्टर बोलाउने तयारी गरिएको थियो। तर, हेलिकोप्टर उड्न नपाउँदै उनको मृत्यु भएको खबर आएको नेकपा एमालेका प्रमुख सचेतक ऐन महरले जानकारी दिए।

विज्ञापन

महरका अनुसार जोशीको अवस्था गम्भीर रहेकाले तत्काल हेलिकोप्टरमार्फत उद्धार गर्न आफन्तले आग्रह गरेका थिए। त्यसपछि जिल्ला प्रशासन कार्यालय बझाङ, गृह मन्त्रालयलगायतका निकायसँग समन्वय गरी हेलिकोप्टर उडाउने तयारी गरिएको थियो।

‘अवस्था असाध्यै गम्भीर छ र तुरुन्तै हेलिकोप्टरबाट उद्धार गर्नुपर्छ, नत्र बाँच्न गाह्रो छ भन्ने आफन्तजनहरूको भनाइपछि तुरुन्तै जिल्ला प्रशासन कार्यालय बझाङ, गृह मन्त्रालयलगायतका निकायमा पहल गरी हेलिकोप्टरको उडानको तयारी हुँदै थियो,’ महरले भने, ‘खबर पाएको करिब आधा घण्टाभित्रै हेलिकोप्टर उडाउने तयारी भएको थियो, तर एकैछिनमा दुःखद खबर आयो कि अब उहाँ रहनुभएन।’

जोशी २०७४ सालमा नेकपा एमालेबाट र २०७९ सालमा नेकपा एकीकृत समाजवादीबाट वडाध्यक्षमा निर्वाचित भएका थिए। उनी दुई कार्यकाल वडाध्यक्ष बनेका थिए।