निर्यात ५७ प्रतिशतले बढ्दा व्यापार घाटा ५ खर्ब ३२ अर्बभन्दा माथि

चालु आर्थिक वर्ष २०८३/८४ को पहिलो तीन महिनामा नेपालको वैदेशिक व्यापारमा उल्लेख्य विस्तार भएको छ। साउनदेखि असोजसम्मको अवधिमा निर्यात व्यापार ५७.०३ प्रतिशतले बढे पनि आयातमा भएको उच्च वृद्धिका कारण व्यापार घाटा ५ खर्ब ३२ अर्ब ४९ करोड रुपैयाँ पुगेको छ।

गत आर्थिक वर्ष २०८२/८३ को सोही अवधिमा व्यापार घाटा ३ खर्ब ९५ अर्ब ३० करोड रुपैयाँ रहेको थियो। यससँग तुलना गर्दा चालु आर्थिक वर्षको पहिलो त्रैमासमा व्यापार घाटा ३४.७१ प्रतिशतले बढेको देखिन्छ।

वैदेशिक व्यापारसम्बन्धी तथ्याङ्कअनुसार समीक्षा अवधिमा नेपालको कुल वैदेशिक व्यापार ४०.७१ प्रतिशतले बढेर ७ खर्ब ६१ अर्ब ७ करोड रुपैयाँ पुगेको छ। अघिल्लो आर्थिक वर्षको पहिलो तीन महिनामा कुल वैदेशिक व्यापार ५ खर्ब ४० अर्ब ८६ करोड रुपैयाँमा सीमित थियो।

विज्ञापन

निर्याततर्फ भने सुधार देखिएको छ। चालु आर्थिक वर्षको पहिलो त्रैमासमा नेपालबाट १ खर्ब १४ अर्ब २८ करोड रुपैयाँ बराबरका वस्तु तथा सेवा निर्यात भएका छन्। अघिल्लो वर्षको सोही अवधिमा निर्यात ७२ अर्ब ७८ करोड रुपैयाँ बराबर थियो।

यता, आयातमा पनि उल्लेख्य वृद्धि भएको छ। असोज मसान्तसम्ममा ६ खर्ब ४६ अर्ब ७८ करोड रुपैयाँ बराबरका वस्तु आयात भएका छन्। गत आर्थिक वर्षको सोही अवधिमा आयात ४ खर्ब ६८ अर्ब ८ करोड रुपैयाँ रहेको थियो। यसअनुसार आयात ३८.१८ प्रतिशतले बढेको छ।

निर्यातमा भएको वृद्धिका कारण आयात र निर्यातबीचको अनुपातमा भने सुधार आएको छ। अघिल्लो आर्थिक वर्षको पहिलो त्रैमासमा एक रुपैयाँ बराबरको वस्तु निर्यात गर्दा ६ रुपैयाँ ४३ पैसाको आयात हुने गरेकोमा चालु आर्थिक वर्षको सोही अवधिमा यो अनुपात घटेर ५ रुपैयाँ ६६ पैसामा झरेको छ।

त्यसैगरी, कुल वैदेशिक व्यापारमा निर्यातको हिस्सा पनि बढेको छ। अघिल्लो वर्ष १३.४६ प्रतिशत रहेको निर्यातको हिस्सा चालु आर्थिक वर्षको पहिलो त्रैमासमा बढेर १५.०२ प्रतिशत पुगेको छ।

यसको विपरीत कुल वैदेशिक व्यापारमा आयातको हिस्सा घटेको छ। अघिल्लो आर्थिक वर्षको पहिलो तीन महिनामा ८६.५४ प्रतिशत रहेको आयातको हिस्सा चालु आर्थिक वर्षको समीक्षा अवधिमा ८४.९८ प्रतिशतमा झरेको छ।

समग्रमा, निर्यात व्यापारमा उल्लेख्य वृद्धि र कुल व्यापारमा निर्यातको हिस्सा बढ्नु सकारात्मक संकेत भए पनि आयातको ठूलो आकारका कारण व्यापार घाटा भने अझै उच्च रहेको तथ्याङ्कले देखाएको छ।