विधेयक छिटो अघि बढाउन सभामुखको आग्रह

काठमाडौं।सभामुख डोलप्रसाद (डीपी) अर्यालले प्रतिनिधिसभाअन्तर्गतका विषयगत समितिमा विचाराधीन विधेयकलाई छिटो अघि बढाउन आग्रह गरेका छन्।

विषयगत समितिका सभापतिहरूसँग समसामयिक विषयमा छलफल गर्दै उनले विधेयकमाथि गहन छलफल गरी समितिको कामलाई प्रभावकारी र परिणाममुखी बनाउन आग्रह गरेका हुन्।

उनले विधेयकमाथि संशोधन प्रस्ताव दर्ता गर्दा प्रचलित नियम र कानुनी प्रक्रियाको पालना गर्न पनि सुझाव दिए। सम्बन्धित राजनीतिक दल तथा विषयविज्ञसँग आवश्यक छलफल गरेर औचित्यपूर्ण संशोधन प्रस्ताव अघि बढाउनु पर्ने उनको भनाइ थियो। सभामुख अर्यालले समितिमा हुने छलफललाई प्रभावकारी बनाउँदै विधेयक निर्माण प्रक्रियालाई गति दिनुपर्नेमा जोड दिए।