राप्ती साहित्य परिषद्, जिल्ला शाखा दाङले महाकवि लक्ष्मीप्रसाद देवकोटाको ११८औँ जन्मजयन्तीको अवसरमा ‘महाकवि देवकोटा साङ्गीतिक साँझ’ सम्पन्न गरेकाे छ।
दाङको घोराहीस्थित कौशी होटलमा राप्ती साहित्य परिषद्, जिल्ला शाखा दाङका अध्यक्ष यम रेग्मीको अध्यक्षता तथा संगीतज्ञ गोविन्दराज श्रेष्ठ प्रमुख आतिथ्यमा कार्यक्रम भएकाे हाे।
कार्यक्रममा भाषा आयोगका पूर्व सदस्य डा. अमर गिरी, वरिष्ठ साहित्यकार तथा संस्कृतिविद् डा. गोविन्द आचार्य र राप्ती साहित्य परिषद् केन्द्रीय समितिका सल्लाहकार तथा पूर्वअध्यक्ष पुरुषोत्तम खनाल विशिष्ट अतिथिका रूपमा सहभागी थिए।
परिषद्का सचिव घनश्याम केसीले सञ्चालन गरेकाे कार्यक्रममा कार्यक्रममा सुरेशकुमार पाण्डेयले शब्दमार्फत अतिथिजनकाे स्वागत गरेका थिए।
महाकवि देवकोटाका साहित्यिक तथा सांस्कृतिक योगदानको स्मरण गर्दै आयोजना गरिएको कार्यक्रममा कवि तथा गायकहरू डा. गोविन्दाचार्य, नारायण नेपाल, राजेन्द्र श्रेष्ठ, अम्बिका रिजाल, पिताम्बर रिजाल र गोविन्द मधुर आचार्यले कविता, गीत तथा सांगीतिक प्रस्तुति दिएका थिए। उनीहरूका प्रस्तुतिले कार्यक्रमलाई थप साहित्यिक, सांगीतिक र मनोरञ्जनात्मक बनाएको थियो।कार्यक्रममा वाद्यवादनतर्फ रामहरि रिजाल र सुशीलकुमार गुप्ताले साथ दिएका थिए।
कार्यक्रमका अध्यक्ष यम रेग्मीले कार्यक्रमको उद्देश्य, महत्त्व र औचित्यबारे स्पष्ट पारेका थिए। उनले महाकवि देवकोटाको साहित्यिक योगदान नयाँ पुस्तामाझ परिचित गराउँदै साहित्य र सङ्गीतको माध्यमबाट नेपाली भाषा, कला, संस्कृति र सिर्जनशीलताको प्रवर्द्धन गर्ने उद्देश्यले कार्यक्रम आयोजना गरिएको बताए।
साहित्य र सङ्गीतलाई एउटै मञ्चमा जोड्दै सम्पन्न कार्यक्रमले दाङको साहित्यिक तथा सांस्कृतिक क्षेत्रमा नयाँ ऊर्जा र उत्साह थपेको आयोजकको विश्वास छ।
प्रतिक्रियाहरू
कृपया सभ्य र मर्यादित भाषामा प्रतिक्रिया दिनुहोस्। अपमानजनक, मानहानिकारक वा घृणा फैलाउने प्रतिक्रियाहरू हटाइनेछन्।
अहिलेसम्म कुनै प्रतिक्रिया छैन। आफ्नो विचार राख्ने पहिलो व्यक्ति बन्नुहोस्।