काठमाडौंका चोकचोकमा ‘वाटर एटीएम’ : पाँच रुपैयामै १ लिटर पानी !

कोरखबर ३० माघ, २०७७

३० माघ, काठमाडौं । खानेपानी मन्त्रालय, काठमाडौं महानगरपालिका र काठमाण्डौ उपत्यका खानेपानी व्यवस्थापन बोर्डको संयुक्त प्रयासमा काठमाडौंमा वाटर एटीएम संञ्चालनमा आएको छ । खानेपानी मन्त्री मणिचन्द्र थापाले विहिबार एक कार्यक्रमका बिच वाटर एटीएमको उद्घाटन गरे ।

वाटर एटीएम जडान भएसँगै स्वच्छ र गुणस्तरीय पानी पिउने सुविधा उपलब्ध भएको र सर्वसाधारण लाभान्वित हुने मन्त्री थापाले बताए । उनले १५ वटा एटीएम राख्ने लक्ष्य रहेको र हाल चार स्थानमा सञ्चालनमा आएको जानकारी दिए ।

पहिलो चरणमा विहिबार रत्नपार्क, बालाजु र स्वयम्भु भगवान पाउमा एकैसाथ वाटर एटीएम सञ्ञ्चालनमा ल्याईएको छ ।

कति रुपैयामा कति पानी पाईन्छ ?

२ सय मिलिमिटर पानीका लागी उपभोक्ताले १ रुपैयाँ तिर्नुपर्नेछ ।
प्रति लिटर पानीको ५ रुपैयाँ तिर्नुपर्ने व्यवस्था गरिएको छ ।
एटीएमबाट जाडोमा तातो र गर्मीमा चिसो पानी उपलब्ध गराउने प्रणाली पनि जडान गरिएको छ ।

पानी दिने एटिएम (वाटर भेन्डिङ मेसिन) कसरी प्रयोग गर्ने ?

रु. पाँच वा १० को नोटलाई वाटर भेन्डिङ मेसिनसँगै रहेको पैसा साट्ने मेसिनबाट रु. १ को सिक्कामा साट्ने ।
साटेको रु. १ को सिक्कालाई कप डिस्पेन्सर मेसिनको सिक्का हाल्ने ठाउँमा छिराउने र २०० मिलिलिटर कागजको कप लिने ।
कपलाई लगेर कप वा बोतल थाप्ने धाराको तल राख्ने ।
अनि रु. १ को सिक्कालाई धारासँगैको सिक्का हाल्ने ठाउँमा धारा र सिक्का हाल्ने ठाउँको अंक मिलाई छिराउने ।
२०० मिलिलिटर शुद्ध पिउने पानी कप वा बोतलमा झर्ने छ ।
त्यसरी प्रयोग गरेको कपलाई फोहोर फाल्ने भाँडामा फाल्ने ।

नागरिकको सहजताको लागी सरकारले हप्तादिनभित्रमा कलंकी, मालपोत, बानेश्वर, बंगलामुखी मन्दिर, कसुन्ती यातायात कार्यालय र शंखपार्क धुम्बराहीमा पनि ‘वाटर एटीएम संचालन गर्ने तयारी गरेको छ ।