महाधिवेशन नहुनुको दोष महामन्त्रीहरूले सभापतिलाई थोपर्न मिल्दैन: डा. महत

नेपाली कांग्रेसका प्रवक्ता डा. प्रकाश शरण महतले पार्टीको महाधिवेशन समयमै हुन नसक्नुको दोष महामन्त्रीद्वय गगन थापा र विश्वप्रकाश शर्माले पार्टी सभापति शेरबहादुर देउवालाई थोपर्न नमिल्ने बताएका छन्।

बुधबार नागरिक न्युजको डिजिटल संवाद कार्यक्रम ‘नागरिक फ्रन्टलाइन’ मा बोल्दै डा. महतले महाधिवेशनको कार्यतालिका र व्यवस्थापनको मुख्य जिम्मेवारी महामन्त्रीहरूकै भएकाले अहिले आएर सभापतिलाई दोष दिनु ‘दुर्भाग्यपूर्ण’ हुने बताएका हुन्।

प्रवक्ता महतले महाधिवेशन गर्ने प्रस्ताव र त्यसको व्यवस्थापन समितिको संयोजकको भूमिका महामन्त्रीहरूकै रहेको स्मरण गराए।

विज्ञापन

‘विशेषगरी महामन्त्रीज्यू नै व्यवस्थापन समितिको संयोजक हो। स्टेरिङमा बसेका साथीहरूले नै अहिले आएर ‘यो गर्न नसकिने भयो, यो अरूको कारणले वा सभापतिको कारणले हो’ भन्न मिल्दैन,’ महतले भने, ‘उहाँहरूले नै ल्याएको प्रस्तावमा हामीले सहमति जनाएका हौँ। अहिले समय पुगेन भनेर सभापति वा अरूलाई दोष दिनु गलत हुन्छ।’