नेपाल प्रिमियर लिग (एनपीएल) अन्तर्गत जारी चौथो खेलमा सुदूरपश्चिमविरुद्ध पहिले ब्याटिङ गरिरहेको पोखरा एभेन्जर्स दबाबमा परेको छ।
कीर्तिपुरस्थित त्रिवि क्रिकेट मैदानमा टस हारेर ब्याटिङको निम्तो पाएको पोखराले ११ ओभरको समाप्तिमा ४ विकेट गुमाएर ७८ रन मात्र बनाउन सकेको छ।
सुदूरपश्चिमका बलरहरू हाबी भएपछि पोखराले पछिल्लो ५ ओभरमा २ विकेट गुमाउँदै मात्र २७ रन जोड्न सक्यो।
पोखराका कप्तान कुशल भुर्तेल १७ बलमा २ चौकासहित २१ रन बनाएर ९.१ ओभरमा दीपेन्द्रसिंह ऐरीको बलमा अनिल खरेलद्वारा क्याच आउट भए।
त्यसलगत्तै ११ औँ ओभरको अन्तिम बलमा अनुभवी अलराउन्डर शकिब अल हसन १६ बलमा १ चौका प्रहार गर्दै १४ रन बनाएर पभेलियन फर्किए। उनी अनिल खरेलको बलमा स्कट कुगेलेइनको हातबाट क्याच भए।
यसअघि ओपनिङ ब्याटर महेदी हसनले २१ बलमा ४ चौका र १ छक्का प्रहार गर्दै सर्वाधिक ३२ रन बनाएका थिए भने अर्का ओपनर दिनेश खरेल ४ रनमै आउट भएका थिए। हाल क्रिजमा सदिरा समरविक्रमा ६ बलमा ६ रन बनाएर टिकिरहेका छन्।
बलिङतर्फ सुदूरपश्चिमका अनिल खरेलले २ ओभरमा १७ रन खर्चेर महत्त्वपूर्ण २ विकेट लिएका छन्।
यस्तै दीपेन्द्रसिंह ऐरीले २ ओभरमा कसिलो बलिङ गर्दै मात्र ९ रन दिएर १ विकेट लिए भने हेमन्त धामीले ३ ओभरमा १४ रन खर्चेर १ विकेट हात पारे। स्कट कुगेलेइनले २ ओभरमा २५ रन र सेफ जेबले २ ओभरमा १३ रन खर्चिएका छन्।
यसअघि कीर्तिपुरमा सुदूरपश्चिमले टस जितेर पहिले फिल्डिङ गर्ने निर्णय गरेको थियो।
प्रतिक्रियाहरू
कृपया सभ्य र मर्यादित भाषामा प्रतिक्रिया दिनुहोस्। अपमानजनक, मानहानिकारक वा घृणा फैलाउने प्रतिक्रियाहरू हटाइनेछन्।
अहिलेसम्म कुनै प्रतिक्रिया छैन। आफ्नो विचार राख्ने पहिलो व्यक्ति बन्नुहोस्।