पाइलटसहित तीन जनाको ज्यान गएपछि रियाद विमानस्थल पुनः सञ्चालनमा

साउदी अरेबियाले रियादस्थित किङ खालिद अन्तर्राष्ट्रिय विमानस्थल पुनः सञ्चालनमा ल्याएको छ।

हुथी विद्रोहीको आक्रमणमा पाइलटसहित तीन जनाको ज्यान गएको छ भने अन्य केही घाइते भएका छन्। साउदी अरेबियाको नागरिक उड्डयन प्राधिकरण (जीएसीए) ले शुक्रबार जारी गरेको विज्ञप्तिअनुसार बिहीबार भएका दुई आक्रमणमध्ये एउटाले विमानस्थलका संरचना र अर्कोले साउदीको राष्ट्रिय ध्वजावाहक साउदी एयरलाइन्सको विमानलाई लक्षित गरेको थियो।

आक्रमणबाट भौतिक क्षति हुनुका साथै सामान्यदेखि गम्भीर चोटपटक लागेको प्राधिकरणले जनाएको छ। विमानस्थलको सञ्चालन पुनः सुरु भएको र हवाई यातायात सामान्य अवस्थामा फर्किएको पनि विज्ञप्तिमा उल्लेख छ।

विज्ञापन

साउदी एयरलाइन्सले आफ्ना पाइलट क्याप्टेन हमुद अली अलकाल्थामीको आक्रमणमा ज्यान गएको पुष्टि गरेको छ। विमानमा पनि क्षति पुगेको कम्पनीले जनाएको छ।

साउदी अरेबियामा पछिल्ला दिनमा हुथी विद्रोहीले विमानस्थललाई लक्षित गरी आक्रमण गर्दै आएका छन्। जीएसीएका अनुसार साताको सुरुआतमा आभा र किङ खालिद विमानस्थलमा भएका आक्रमणमा तीन जना सर्वसाधारणको ज्यान गएको थियो भने ३६ जना घाइते भएका थिए।

यमनको सीमासँग नजिक रहेका जाजान र नजरान विमानस्थलमा भएका अन्य आक्रमणमा पनि कम्तीमा तीन जना घाइते भएका थिए।

हुथी समूहका सैन्य प्रवक्ताले बिहीबार किङ खालिद विमानस्थलतर्फ क्षेप्यास्त्र प्रहार गरेको बताएका थिए। उनले लक्षित स्थानमा प्रहार भएको र त्यसबाट क्षति पुगेको दाबी गरेका थिए।

यसैबिच, यमन सरकारलाई समर्थन गर्दै आएको साउदी नेतृत्वको गठबन्धनले हुथी समूहले प्रयोग गरेका तीन वटा रकेट प्रक्षेपण स्थल ध्वस्त पारेको जनाएको छ। गठबन्धनले नागरिक र नागरिक पूर्वाधारमाथि हुने आक्रमणको कडा जवाफ दिने चेतावनी दिएको छ।

हुथी विद्रोहीविरुद्ध यमनी सरकारी सेनाले कारबाही जारी राखेपछि साउदी अरेबियामा तनाव बढेको छ। यसले क्षेत्रीय द्वन्द्व थप फैलिने जोखिम बढाएको छ।