ट्रम्प निकट राष्ट्रपति पेनाको राजीनामा, महाभियोग र फौजदारी अनुसन्धान पनि सुरु

पाराग्वेका राष्ट्रपति सान्टियागो पेनाले बैंक संकटमा आफ्नो नाम जोडिएपछि पदबाट राजीनामा दिने घोषणा गरेका छन्।

तर उनको राजीनामा संसदबाट स्वीकृत भएको छैन। बरु उनीमाथि महाभियोग प्रक्रिया र फौजदारी अनुसन्धानसमेत अघि बढेको छ।

युएनो बैंकको आर्थिक संकटपछि लाखौं ग्राहकको बचत रोकिएको थियो। करिब २९ लाख ग्राहक रहेको बैंकको वित्तीय अवस्था कमजोर भएपछि पाराग्वेको केन्द्रीय बैंकले हस्तक्षेप गरेको थियो। बैंकमा सार्वजनिक निकायको रकम जम्मा भएको र राष्ट्रपतिको पनि बैंकसँग व्यावसायिक सम्बन्ध रहेको विषयले विवाद चर्किएको हो।

विज्ञापन

पाराग्वेका महान्यायाधिवक्ताले बैंकको निगरानी, बैंक बन्द गर्ने निर्णय र सार्वजनिक रकमको कारोबारबारे तीन वटा फौजदारी अनुसन्धान सुरु गरेका छन्। अनुसन्धानमा पेनासहित बैंक संकटसँग सम्बन्धित अधिकारीहरूको भूमिका पनि हेरिने भएको छ। बैंकका संस्थापकसहित आठ उच्च अधिकारी पक्राउ परेका छन् भने २७ बैंक अधिकारी र व्यावसायिक साझेदारमाथि विभिन्न कसुरमा अभियोग लगाइएको छ।

पेना सन् २०२५ सम्म युएनो बैंकको मूल कम्पनीसँग सम्बन्धित समूहका सेयरधनी थिए। उनले आफ्नो सेयर बिक्री गरिसकेको बताएका छन्। तर बैंकसँगको उनको पुरानो सम्बन्ध, सार्वजनिक निकायको रकम बैंकमा जम्मा भएको विषय र केन्द्रीय बैंकको नियमनमाथि प्रश्न उठेपछि विवाद थप चर्किएको हो।

पेनाले सामाजिक सञ्जालमा भिडियो सन्देश जारी गर्दै देशको स्थिरता, सामाजिक शान्ति र लोकतान्त्रिक संस्थाको संरक्षणका लागि राजीनामा दिने निर्णय गरेको बताएका छन्। उनले भने, ‘देशको स्थिरता, सामाजिक शान्ति र लोकतान्त्रिक संस्थाको संरक्षण गर्ने आवश्यकतालाई ध्यानमा राखेर मैले राष्ट्रपतिको पदबाट राजीनामा दिने निर्णय गरेको छु।’

तर तल्लो सदनले उनको राजीनामा स्वीकार नगरी ७८-० मतले महाभियोग प्रक्रिया अघि बढाएको छ। अब सिनेटमा महाभियोगको सुनुवाइ र अन्तिम निर्णयको प्रक्रिया अघि बढ्नेछ। राजीनामा स्वीकृत भए उपराष्ट्रपति पेद्रो आलियानाले बाँकी कार्यकाल सम्हाल्नेछन्।

बैंक संकटपछि पाराग्वेमा लगातार प्रदर्शनसमेत भएका छन्। बचतकर्ताले आफ्नो रकम फिर्ता गर्न माग गरेका छन् भने बैंकका कर्मचारीले रोकिएको तलब र रोजगारीको सुरक्षा माग्दै प्रदर्शन गरेका छन्। प्रभावित ग्राहकलाई रकम फिर्ता गर्ने र उनीहरूको खाता अन्य बैंकमा सार्ने प्रक्रिया पनि सुरु गरिएको अधिकारीहरूले बताए।

सन् २०२३ अगस्टमा पाँच वर्षका लागि राष्ट्रपति बनेका पेना अमेरिकी राष्ट्रपति डोनाल्ड ट्रम्पका निकट सहयोगी मानिन्छन्। उनको कार्यकाल सन् २०२८ सम्म रहने थियो।