मंसिर २७ , काठमाडौं । सरकार अधिनायकवादी बाटोमा हिँडेको निष्कर्षका साथ नेपाली कांग्रेसले आगामी २९ गतेका लागि देश्व्यापी विरोधसभाको आयोजना गरेको छ । सोही दिनकोे एक दिनअघि मात्रै प्रधानमन्त्री केपी शर्मा ओलीले संवैधानिक परिषदको बैठक डाकेपछि प्रमुख प्रतिपक्षी दल नेपाली कांग्रेसका सभापति शेरबहादुर देउवाले सो बैठक बहिष्कार गर्ने भएका छन् ।
कांग्रेसले २९ गतेका लागि आन्दोलनको तयारी गरिरहेको जानकारी दिँदै आफ्ना पार्टी सभापति सो बैठकमा उपस्थित हुन नसक्ने जानकारी दिएको छ । कांग्रेस प्रवक्ता विश्वप्रकास शर्माले आफूहरुले आन्दोलनको घोषणा गरिसकेको अवस्थामा संवैधानिक परिषदको बैठक तय गरिनु जायज नभएको बताएका छन् ।
सत्तारुढ दल नेकपाको स्थायी समितिको बैठक पनि २८ गतेका लागि तय गरिएको छ । कांग्रेसको आन्दोलन र नेकपाकै बैठकका बीच परिषदको बैठक बोलाइनुमा गलत नियत देखिएको कांग्रेसका प्रवक्ता शर्माको आरोप छ ।
संवैधानिक परिषदको बैठकमा विपक्षी दलको नेता अनिवार्य उपस्थित हुनुपर्ने व्यवस्था छ । त्यसैले देउवाको अनुपस्थितिमा सो बैठकको औचित्य नहुने देखिन्छ ।
आफ्नै पार्टीभित्र घेराबन्दीमा परेका वेला राखिएको स्थायी समिति बैठक छल्ने उद्देश्यले संवैधानिक परिषदको बैठक राखिएको आकलन राजनीतिक वृत्तमा गरिएको छ ।
प्रदेश १
प्रदेश २
बागमती
गण्डकी
प्रदेश ५
कर्णाली
सुदूरपश्चिम