ट्राफिकमाथि हातपात गरेको आरोपमा १ जना पक्राउ !

कोरखबर १८ मंसिर, २०७७

मंसिर १८,काठमाडौं । रूपन्देहीमा महिला ट्राफिक प्रहरी हवल्दारमाथि हातपात गरेको आरोपमा एकजना पक्राउ परेका छन् । पक्राउ पर्नेमा रुपन्देहीको सिद्धार्थ नगरपालिका १ को सनसाइन बोर्डिङ स्कुलका सञ्चालक श्याम पाठक छन् ।

पाठकले ड्युटीमा रहेकी ट्राफिक प्रहरी हवल्दारमाथि मादक पदार्थ सेवन गरी हातपात गरेको, ट्राफिक जरिवानाको रसिद च्यातेको र बर्दीसमेत च्यात्न खोजेको पाइएको प्रहरीले जनाएको छ ।

उनीविरुद्ध अभद्र व्यावहारमा मुद्दा चलाइएको रुपन्देहीका एसपी प्रवीण पोखरेलले जानकारी दिए । एसपी पोखरेलका अनुसार रोहिणी गाउँपालिकास्थित नेपाल–भारत सीमामा चार दिनअघि ट्राफिक हवल्दार र महिला असई ड्युटीमा रहेको बेला पाठकले महिला प्रहरीलाई दुरव्यवाहार गरेका थिए ।