कार्तिक २२, काठमाडौँ — प्रधानमन्त्री एवं पार्टी अध्यक्ष केपी शर्मा ओलीलाई सचिवालय बैठकका लागि मनाउन नेकपाका बहुमत सदस्य बालुवाटार पुगेका छन् ।
शनिबार बिहान पार्टी कार्यालय धुम्बाराहीमा कार्यकारी अध्यक्ष पुष्पकमल दाहाल, वरिष्ठ नेता झलनाथ खनाल, माधवकुमार नेपाल, उपाध्यक्ष वामदेव गौतम र प्रवक्ता नारायणकाजी श्रेष्ठ सहभागी अनौपचारिक बैठकपछि उनीहरु बालुवाटार पुगेका हुन् । अर्का अध्यक्ष ओलीलाई बैठकका लागि मनाउन लिखित पत्रसहित भेट्न पुगेको एक नेताले बताए ।
शुक्रबार पनि पार्टी कार्यालयमा यिनै सचिवालयका बहुमत सदस्यको अनौपचारिक बैठक भएको थियो । त्यहाँ औपचारिक बैठकका लागि अर्का अध्यक्ष ओलीलाई भेटेर सामूहिक आग्रह गर्ने सहमति भएको थियो । त्यसैअनुसार उनी ओलीलाई भेट्न बालुवाटार पुगेका हुन् ।
शुक्रबार र शनिबार पार्टी कार्यालयमा बसेको अनौपचारिक बैठकमा अध्यक्ष ओलीसहित सचिवालय सदस्य ईश्वर पोखरेल, रामबहादुर थापा र महासचिव विष्णु पौडेल सहभागी थिएनन् ।
शुक्रबारको सचिवालय बैठकमा अध्यक्ष दाहालले अर्का अध्यक्ष ओलीले जुनसुकै बेला पनि पार्टी विभाजन हुन सक्ने चेतावनी दिएको बिफ्रिङ गरेका थिए ।
दाहालले आफूसँगको भेटमा प्रधानमन्त्री ओलीले पार्टी विभाजन भइसकेको र औपचारिकता मात्रै बाँकी रहेको पनि दाबी गरेका थिए । दाहालको यस्तो बिफ्रिङपछि सचिवालयको अनौपचारिक बैठकले एकताका लागि ओलीलाई आधिकारिक बैठक बोलाउन सामूहिक आग्रह गर्ने निर्णय गरेको थियो ।
प्रदेश १
प्रदेश २
बागमती
गण्डकी
प्रदेश ५
कर्णाली
सुदूरपश्चिम