काठमाडौं। सुदूरपश्चिम रोयल्सले नेपाल प्रिमियर लिग (एनपीएल) मा आफ्नो दोस्रो जित दर्ता गरेको छ। सोमबार भएको खेलमा सुदूरपश्चिमले चितवन राइनोजलाई ५ विकेटले पराजित गरेको हो। चितवनले दिएको १ सय ३० रनको लक्ष्य सुदूरपश्चिमले १६.४ ओभरमा ५ विकेट गुमाएर पूरा गर्यो।
सुदूरपश्चिमका लागि ब्राण्डोन म्याक मुलेनले सर्वाधिक ४३ रन बनाए। उनले २१ बलमा ६ चौका र २ छक्का प्रहार गरे। त्यसैगरी, इशान पाण्डेले २५, आरिफ शेखले २० र सेरफाने रदरफोर्डले २१ रनको योगदान दिए। चितवनका बलर रन्जित कुमारले ३ विकेट लिए पनि टोलीलाई हारबाट जोगाउन सकेनन्।
यसअघि कीर्तिपुरस्थित त्रिवि क्रिकेट मैदानमा टस हारेर ब्याटिङ गरेको चितवनले निर्धारित २० ओभरमा ६ विकेटको क्षतिमा १ सय २९ रन बनाएको थियो। चितवनका लागि रवि वोपाराले सर्वाधिक ४९ रन बनाए। सुदूरपश्चिमका बलर स्कट कुग्लेजिनले २ विकेट लिए भने हेमन्त धामी, दीपेन्द्रसिंह ऐरि र अनिल खरेलले समान १-१ विकेट हात पारे।
चार खेल खेलेको सुदूरपश्चिमको यो दोस्रो जित हो। यसअघि सुदूरपश्चिम लुम्बिनी लायन्ससँग पराजित भएको थियो, पोखरा एभेन्जर्सलाई हराएको थियो र विराटनगर किंग्ससँग पराजित भएको थियो। यता, चितवनको यो पहिलो हार हो।
एनपीएल अन्तर्गत मंगलबार दुई खेल हुनेछन्। पहिलो खेलमा विराटनगर किंग्स र जनकपुर बोल्ट्स तथा दोस्रो खेलमा लुम्बिनी लायन्स र पोखरा एभेन्जर्स भिड्नेछन्।
प्रतिक्रियाहरू
कृपया सभ्य र मर्यादित भाषामा प्रतिक्रिया दिनुहोस्। अपमानजनक, मानहानिकारक वा घृणा फैलाउने प्रतिक्रियाहरू हटाइनेछन्।
अहिलेसम्म कुनै प्रतिक्रिया छैन। आफ्नो विचार राख्ने पहिलो व्यक्ति बन्नुहोस्।