अहिलेसम्मकै ठूलो क्रिप्टो चोरीमा उत्तर कोरियाली ह्याकरको संलग्नता, यसरी चोरियो मानिसको पहिचान

अमेरिकी अधिकारीहरूले ४० करोड डलरभन्दा बढी मूल्यको क्रिप्टोकरेन्सी चोरीमा उत्तर कोरियाली सरकारका ह्याकरहरूको संलग्नता रहेको दाबी गरेका छन्।

अधिकारीहरूका अनुसार नक्कली भिडियो कलमार्फत मानिसहरूको पहिचान चोरी गरेर उक्त रकम ह्याक गरिएको हो।

अमेरिकी संघीय अनुसन्धान ब्युरो (एफबीआई) का अनुसार पछिल्लो १८ महिनामा ९०० भन्दा बढी व्यक्ति यो ठगीको सिकार भएका छन्। अनुसन्धान निकायले ठगीको यो तरिकालाई ‘फेसस्टिलर’ नाम दिएको छ।

विज्ञापन

एफबीआईका साइबर निर्देशक ब्रेट लिथम्यानले उत्तर कोरियाली शासन आफ्नो अवैध हतियार कार्यक्रम सञ्चालन गर्न क्रिप्टोकरेन्सी चोरीबाट प्राप्त हुने ठूलो रकममा निर्भर रहेको बताएका छन्।

उनले भनेका छन्, ‘उत्तर कोरियाली शासन आफ्नो अवैध हतियार कार्यक्रमका लागि ठूलो मात्रामा क्रिप्टोकरेन्सी चोरीबाट प्राप्त हुने रकममा निर्भर छ। पछिल्ला वर्षहरूमा अर्बौं डलर चोरी गरिएको छ।’

यो घटना विश्वकै ठूलो क्रिप्टो एक्सचेन्ज बाइनान्सले ह्याकरहरूले हालै गरेको ठूलो चोरीबारे दाबी गरेको एक सातापछि सार्वजनिक भएको हो।

बाइनान्सले नक्कली जागिर अन्तर्वार्तामार्फत ह्याकरहरूले कीर्तिमानी ६ अर्ब ३० करोड डलर (करिब ५९ खर्ब २५ अर्ब ६० करोड रुपैयाँ) चोरी गरेको जनाएको थियो।

अमेरिकी कानुन कार्यान्वयन गर्ने निकायहरूले बाइनान्समाथि भएको उक्त साइबर हमलामा उत्तर कोरियासँग सम्बन्धित ह्याकरहरू जिम्मेवार रहेको आरोप लगाएका थिए।

उक्त घटनालाई अहिलेसम्मकै सबैभन्दा ठूलो क्रिप्टो ह्याक मानिएको छ। यद्यपि, उत्तर कोरियाले भने आफूमाथि लागेको आरोप अस्वीकार गर्दै आएको छ।