‘मेक अमेरिका हट अगेन’ अभियान चलाइरहेकी ३० वर्षीया युवती

पछिल्लो समय अमेरिकालाई फेरि ‘हट’ बनाउनुपर्छ भन्दै अभियान चलाइरहेकी ३० वर्षीया राकेल डेबोनो चर्चामा छिन्।

उनले युवा र आकर्षक रूढिवादी अमेरिकीलाई एक ठाउँमा ल्याउने उद्देश्यले ‘मेक अमेरिका हट अगेन’ अभियान सुरु गरेकी हुन्। क्यानडामा जन्मिएकी डेबोनोले लन्डनमा कानुन पढेकी थिइन्। उनीसँग दुई वटा मास्टर डिग्री पनि छन्।

करिब दुई वर्ष वकिलका रूपमा काम गरेपछि उनी संगीत व्यवस्थापक स्कुटर ब्राउनसँग जोडिएको एउटा परियोजनामा सहभागी भएकी थिइन्। त्यसपछि उनले अमेरिकी राष्ट्रपति डोनाल्ड ट्रम्पको पहिलो कार्यकालका सहयोगी जोन म्याकएन्टीसँग काम गर्न थालेकी थिइन्।

विज्ञापन

डेबोनो सामाजिक सञ्जालमा विवादास्पद टिप्पणीका कारण पनि चर्चित छिन्। इन्स्टाग्राममा करिब २३ हजार, एक्समा १६ हजार र टिकटकमा ९० हजार फलोअर्स रहेकी उनले आफ्नो सामग्री (कन्टेन्ट) लाई मानिसलाई रिस उठाउने खालको बताउँछिन्।

महिलाको बुद्धिमत्ता र शरीरबारे पनि उनले विवादास्पद टिप्पणी गर्दै आएकी छन्। उनका अनुसार धेरै युवतीको आइक्यु कम हुन्छ र उनीहरू अरूको प्रभावमा छिटो पर्छन्। तर अध्ययनहरूले महिला र पुरुषको औसत आइक्यु करिब समान रहेको देखाउँछन्।

महिलाहरू अरूको समूह वा विचारबाट बढी प्रभावित हुने दाबी पनि उनले गर्दै आएकी छन्। तर यसलाई पुष्टि गर्ने उनीसँग ठोस प्रमाण भने छैन।

यस्ता टिप्पणीका कारण आलोचना भए पनि डेबोनो पछि हटेकी छैनन्। ‘मलाई धेरै पटक आलोचना गरिएको छ, अब त्यसले मलाई असर गर्दैन,’ उनी भन्छिन्।

मे २०२६ मा महिलाको तौलसम्बन्धी टिप्पणी गरेपछि उनी सामाजिक सञ्जालमा झन् धेरै चर्चामा आएकी थिइन्। उनले महिलाले आफ्नो तौल नियन्त्रणमा राख्नुपर्ने बताउँदै १६० पाउन्डभन्दा बढी तौल हुनु ठिक नभएको धारणा राखेकी थिइन्। त्यसपछि आफूले ठुलो संख्यामा ज्यान मार्ने धम्की पाएको दाबी समेत गरिन्।

डेबोनोले सन् २०२३ मा ‘मेक अमेरिका हट अगेन’ अभियान सुरु गरेकी हुन्। युवा रिपब्लिकनलाई एक ठाउँमा ल्याउनु अभियानको मुख्य उद्देश्य रहेको उनी बताउँछिन्।

यो अभियानको सुरुवात न्यूयोर्कमा रूढिवादी युवाका लागि पार्टी आयोजना गरेर भएको थियो। ‘युवा रूढिवादीलाई एउटै ठाउँमा ल्याउने, जो मागा (मेक अमेरिका ग्रेट अगेन) भन्दा कम अनौठा छन्,’ उनले अभियान सुरु गर्दाको सोचबारे बताइन्।

डेबोनोका अनुसार मागा शैलीको रूढिवादी राजनीतिले पार्टीभित्रकै केही युवा रिपब्लिकनलाई टाढा बनाएको छ। उनी सामाजिक विषयमा केही उदार तर आर्थिक विषयमा रूढिवादी युवालाई आफ्नो अभियानमा जोड्न चाहन्छिन्।

बेलायती अखबार द टेलिग्राफसँग कुरा गर्दै डेबोनोले अमेरिकालाई आफूले चाहेको किसिमको मध्यम खालको रूढिवादी राजनीतितर्फ लैजानुपर्ने बताइन्।

‘वामपन्थीहरूसँग डेमोक्रेटिक समाजवादीजस्ता मानिस छन्। उनीहरूले समाजवादलाई आकर्षक बनाइरहेका छन्। दक्षिणपन्थीविरुद्ध लड्न हामीसँग को छ ? हामीलाई पागल नभएको, बिचमा रहेको व्यक्ति चाहिन्छ,’ उनले भनिन्।

डेबोनो ट्रम्पकी समर्थक भए पनि पछिल्लो समय उनीसँग असन्तुष्ट रहेको बताउँछिन्। ‘म अहिले ट्रम्पसँग रिसाएको छु। मलाई लाग्छ, धेरै मानिस अहिले ट्रम्पसँग रिसाएका छन्,’ उनले सुनाइन्।

उनका अनुसार अमेरिकी जनताको मुख्य चासो अहिले दैनिक जीवनसँग जोडिएका आर्थिक विषय हुन्।

‘मानिसहरू अण्डा र ग्यासका लागि कम पैसा तिर्न चाहन्छन्। मेरो जीवनलाई असर गर्ने समस्या के हो? ग्यासको मूल्य कम होस् र मेरो भाडा धेरै नहोस्,’ उनले भनिन्।

डेबोनो क्यानडाकी नागरिक भएकाले अमेरिकी चुनावमा मतदान गर्न पाउँदिनन्। तर उनले ट्रम्पलाई समर्थन गर्ने र आफूले मतदान गर्न पाए रिपब्लिकनलाई मतदान गर्ने बताएकी छन्।