नेपाली राष्ट्रिय कराते टोलीका प्रशिक्षक मन्डेकाजी श्रेष्ठले नेपाल प्रिमियर लिग (एनपिएल) को काठमान्डु गोर्खाजको सद्भावना दूतका रूपमा पुनः निरन्तरता पाएका छन् ।
एनपिएलको तेस्रो संस्करणका लागि फ्रेन्चाइज टोली काठमान्डु गोर्खाजले करातेका प्रशिक्षक मन्डेकाजीसँगै फुटबलर विकेश कुथुलाई सद्भावना दूतमा चयन गरेको हो ।
राष्ट्रिय कराते टोलीका प्रशिक्षक श्रेष्ठ जापानमा सम्पन्न २०औँ एसियाली खेलकुदमा नेपाली कराते टोलीका प्रशिक्षकको भूमिकामा थिए । उनी १३औँ दक्षिण एसियाली खेलकुद (साग) का दोहोरो स्वर्ण पदक विजेता पनि हुन् ।
गोर्खाजले खेलाडीलाई आफ्नो परिवारमा जोड्न पाउँदा खुसी लागेको जनाएको छ । पूर्वखेलाडी तथा प्रशिक्षक मन्डेकाजी श्रेष्ठले खेलकुदमा फरक भूमिकाबाट योगदान गर्न पाउँदा उत्साहित रहेको बताए ।
‘लामो समयदेखि नेपाली खेलकुदमा नै जोडिँदै आएका छौँ । पहिले खेलाडी थियौँ र अहिले प्रशिक्षक भएर नेपाली खेलकुदलाई योगदान दिइरहेका छौँ । तथापि, फरक विधा क्रिकेट खेलमा सद्भावना दूत भएर पछिल्लो समयमा फरक भूमिकामा काम गर्न पाउँदा उत्साहित छौँ । युवाहरूमाझ लोकप्रिय रहेको एनपिएल र फ्रेन्चाइज टोलीको उचाइ बढाउन सक्दो काम गर्नेछौँ,’ प्रशिक्षक मन्डेकाजीले भने ।
एनपिएल सिजन–३ यसै अक्टोबर २६ देखि नोभेम्बर २१ सम्म कीर्तिपुरस्थित त्रिवि क्रिकेट मैदानमा हुँदै छ । काठमान्डु गोर्खाज पहिलो संस्करणमा प्लेअफ पुग्न सकेको थिएन ।
पहिलो संस्करणमा नेट रन रेटका आधारमा पछि पर्दै काठमान्डु पाँचौँ भएको थियो । तर दोस्रो संस्करणमा भने गोर्खाजले प्लेअफ खेल्यो । तथापि, इलिमिनेटरमा लुम्बिनी लायन्ससँग पराजित हुन पुग्यो ।
नेपाल क्रिकेट संघ (क्यान) ले तेस्रो संस्करणको तयारी तीव्र रूपमा अगाडि बढाएको छ ।
प्रतिक्रियाहरू
कृपया सभ्य र मर्यादित भाषामा प्रतिक्रिया दिनुहोस्। अपमानजनक, मानहानिकारक वा घृणा फैलाउने प्रतिक्रियाहरू हटाइनेछन्।
अहिलेसम्म कुनै प्रतिक्रिया छैन। आफ्नो विचार राख्ने पहिलो व्यक्ति बन्नुहोस्।