कार्यालय समय पालना नगर्ने र तोकिएको पोसाक नलगाउने १ हजार १६७ जना सरकारी कर्मचारीलाई विभागीय कारबाही गर्न राष्ट्रिय सतर्कता केन्द्रले सम्बन्धित निकायलाई निर्देशन दिएको छ।
केन्द्रले असोज १ देखि २० गतेसम्म देशका विभिन्न १०६ वटा सरकारी कार्यालयमा गरेको छड्के अनुगमनका क्रममा कर्मचारीहरू नियमविपरीत कार्यमा संलग्न रहेको पाइएको हो।
प्रधानमन्त्री तथा मन्त्रिपरिषद्को कार्यालयका अनुसार अनुगमनका क्रममा कार्यालयको निर्धारित समय पालना नगर्ने १ हजार १३२ जना कर्मचारी भेटिएका थिए। त्यस्तै, तोकिएको पोसाक नलगाई कार्यालयमा उपस्थित हुने ३५ जना कर्मचारी पनि फेला परेका थिए।
अनुगमनबाट नियम उल्लंघन गरेको पुष्टि भएका सबै कर्मचारीमाथि प्रचलित नियमअनुसार विभागीय कारबाही गर्न केन्द्रले सम्बन्धित मन्त्रालय तथा कार्यालयहरूलाई निर्देशन दिएको छ।
सरकारी कार्यालयमा कर्मचारीको समयपालना, अनुशासन र निर्धारित पोसाकको प्रयोग सुनिश्चित गर्ने उद्देश्यले केन्द्रले छड्के अनुगमन गरेको जनाएको छ।
प्रतिक्रियाहरू
कृपया सभ्य र मर्यादित भाषामा प्रतिक्रिया दिनुहोस्। अपमानजनक, मानहानिकारक वा घृणा फैलाउने प्रतिक्रियाहरू हटाइनेछन्।
अहिलेसम्म कुनै प्रतिक्रिया छैन। आफ्नो विचार राख्ने पहिलो व्यक्ति बन्नुहोस्।