मेची राजमार्गको ताप्लेजुङ-काबेली सडकखण्डअन्तर्गत पाथीभरा याङवरक गाउँपालिका-१ स्थित खहरेमा विपरीत दिशाबाट आइरहेका दुईवटा बस एकआपसमा ठोक्किँदा तीन जना घाइते भएका छन्।
घाइते तीनै जनाको टाउकोमा चोट लागेको भए पनि अवस्था बोल्न सक्ने र मध्यम रहेको जिल्ला प्रहरी कार्यालयले जनाएको छ। घाइतेहरूलाई उपचारका लागि पाँचथरस्थित जिल्ला अस्पतालतर्फ पठाइएको जिल्ला प्रहरी प्रमुख (डिएसपी) कमल बजगाँईले जानकारी दिए।
प्रहरीका अनुसार दुर्घटनामा भक्तपुर नगरपालिका-३ वंशगोपाल बस्ने अन्दाजी ४८ वर्षीय लक्ष्मी सोनेप, सूर्यविनायक नगरपालिका-६ फलाटे बस्ने अन्दाजी ३८ वर्षीया सुनिता सोहङमिखा र काठमाडौं तारकेश्वर नगरपालिका-४ बस्ने अन्दाजी ४७ वर्षीया सुनिता कटुवाल घाइते भएका छन्।
डिएसपी बजगाँईका अनुसार ताप्लेजुङबाट झापातर्फ जाँदै गरेको प्र.३-०१-००६ख ०५९६ नम्बरको बस र विपरीत दिशाबाट आउँदै गरेको बा.प्र.०१-००६ख ५६५८ नम्बरको बस खहरेमा एकआपसमा ठोक्किएका हुन्।
घटनाको उद्धार तथा थप अनुसन्धानका लागि प्रहरी सहायक निरीक्षक कृष्णकुमार माझीको नेतृत्वमा प्रहरी टोली परिचालन गरिएको प्रहरीले जानकारी दिएको छ।
प्रतिक्रियाहरू
कृपया सभ्य र मर्यादित भाषामा प्रतिक्रिया दिनुहोस्। अपमानजनक, मानहानिकारक वा घृणा फैलाउने प्रतिक्रियाहरू हटाइनेछन्।
अहिलेसम्म कुनै प्रतिक्रिया छैन। आफ्नो विचार राख्ने पहिलो व्यक्ति बन्नुहोस्।