वैशाख २३, मकवानपुर । कोरोना संक्रमितको संख्या बढ्दै गएपछि मकवानपुरका निजी अस्पताललाई पनि कोभिड अस्पतालका रूपमा प्रयोग गरिने भएको छ । यी अस्पताल आईसीयू सेवासहितको हुनेछन् ।
जिल्ला कोभिड–१९ संकट व्यवस्थापन केन्द्रले बुधबार मात्रै हेटौंडा–११ स्थित चुरेहिल अस्पतालमा आईसीयू सेवासहितको २५ बेडको कोरोना विशेष अस्पताल सञ्चालन गर्ने निर्णय गरेको छ ।
‘सक्रिय संक्रमित बढिरहेका छन् । आईसीयूको अभाव नहोस् भनेर निजी अस्पताललाई पनि प्रयोग गर्न थालेका हौं,’ प्रजिअ भरतमणि पाण्डेले निजी अस्पताल एसोसिएसनसँग यस विषयमा समझदारी भइसकेको बताए । हाल हेटौंडा अस्पतालमा ७० बेडको आईसीयू कक्ष सञ्चालनमा छ ।
यही साता सञ्चालनमा ल्याइएको ३० बेडको आईसीयू संक्रमितले दुई दिनमै भरिएपछि अस्पतालमा आईसीयूका ४० बेड थपिएको हो । ‘निजी अस्पतालको सहयोगमा कभर्ड हलमा पनि अक्सिजनसहितको बेडको व्यवस्था गर्दै छौं । यो महामारीको समयमा निजी क्षेत्रसँग सहकार्य गरेर अगाडि बढ्ने हाम्रो योजना रहेको छ,’ पाण्डेले भने ।
हेटौंडामा कोरोनाको दोस्रो लहर सुरु भएयता ६ जनाले ज्यान गुमाइसकेका छन् भने संक्रमितको संख्या ७ सय नाघिसकेको छ । स्वास्थ्यकर्मीको अभाव हुन नदिन हेटौंडा उपमहानगरले तत्काल स्वास्थ्यकर्मी नियुक्त गरी काजमा खटाउने भएको छ ।
प्रदेश १
प्रदेश २
बागमती
गण्डकी
प्रदेश ५
कर्णाली
सुदूरपश्चिम