अमेरिकीहरुले अर्को महिना नै कोरोनाविरुद्धको खोप पाउन सक्ने !

कोरखबर ८ मंसिर, २०७७

मंसिर ८,बीबीसी । कोभिड विरुद्धको पहिलो खोप अमेरिकीहरुले आगामी डिसेम्बर ११ मै प्राप्त गर्न सक्ने कोरोना भाइरस खोप कार्यक्रमका प्रमुखले बताएका छन् । डाक्टर मोनसेफले सीएनएनसँग बताएअनुसार खोप स्वीकृत भएको २४ घण्टामै त्यसको प्रयोगका लागि खोप लगाउने स्थलहरुमा वितरण गरिनेछ ।

पछिल्ला केही हप्ता अमेरिकामा कोरोना संक्रमण अधिक उच्च बिन्दुमा पुगेका बेला यस्तो खबर सार्वजनिक हुनुलाई आशावादी मानिएको छ । अमेरिकी कम्पनी फाइजर र यसको जर्मन पार्टनर बायोएनटेकले शुक्रबार मात्र अमेरिकामा खोपको आपत्कालीन प्रयोगका लागि स्वीकृति माग गरेको थियो । यो खोपको दुईवटा डोज आवश्यक पर्नेछ र अहिलेसम्मका अध्ययन र परीक्षण हेर्दा यो ९५ प्रतिशतसम्म प्रभावकारी हुने देखिएको छ । फाइजरले यही डिसेम्बरको अन्त्यसम्ममा झन्डै ५ करोड डोज उत्पादन गर्ने अपेक्षा गरेको छ ।

अमेरिकाको एफडीए समितिले यो खोपलाई स्वीकृति दिने सम्बन्धी डिसेम्बर १० मा अन्तिम छलफल र बैठक बस्ने बताएको छ । खोप आधिकारिक रुपमा स्वीकृत भइसकेपछि यसलाई स्टेटको जनसंख्याका आधारमा वितरण गरिनेछ । डाक्टर स्लाओइका अनुसार यसमा कसलाई पहिले खोप दिने भन्ने निर्णयका लागि स्टेटहरुले आफैँ जिम्मा लिनुपर्ने हुन्छ । तर, पहिले उच्च जोखिमयुक्त वर्ग जस्तै स्वास्थ्यकर्मी अनि जेष्ठ नागरिकहरुलाई नै प्राथमिकता दिन सुझाव दिँइदै आएको छ ।

अर्को कम्पनी मोडेर्नाको खोप पनि ९५ प्रतिशत प्रभावकारी भएको दाबी गरिएको छ र कम्पनीले पनि आगामी केही हप्तामै आधिकारिक स्वीकृतिका लागि निवेदन दिने अपेक्षा रहेको छ ।

डाक्टर स्लाओइ भन्छन् दुवै खोपको प्रभावकारीता हेर्दा अमेरिकामा आगामी मे महिनासम्म ७० प्रतिशत जनसंख्यालाई सुइ लगाइ सकिनेछ । तर, अर्कोतर्फ खोपप्रति मानिसहरुले नकारात्मक धारणा पनि बढ्दै गएको पाइएको छ जसमा सुधार आउने आशा रहेको उनले बताए । सामान्य जीवनमा फर्कनु अगाडि अधिकांश मानिसले खोप लगाउनैपर्ने उनी बताउँछन् ।

वरिष्ठ संक्रमक रोग विशेषज्ञ एन्थोनी फाउसीले भनेका छन्, “पर्याप्त अमेरिकीहरुले सुइ लगाउन पाए भने अमेरिका, धेरै छिटो कोभिड विरुद्ध ‘हर्ड इम्युनिटी’ को स्थितिमा पुग्न सक्नेछ । र, संक्रमण नियन्त्रण गर्न सहज हुनेछ ।” दुईवटै खोपका ट्रायलको पूरा डाटा नआइसकेको भएपनि हालसम्म यिनमा कुनै समस्या देखा परेको छैन । तर, ती खोपले कति समयसम्म मान्छेलाई सुरक्षा दिलाउन सक्छ भन्ने चाहिँ अझै स्पष्ट भएको छैन ।