मोदीको नाम लिँदै ध्रुव राठीले भने : म सत्ता परिवर्तनका लागि आएको होइन

चर्चित युट्युबर ध्रुव राठीले आफू सत्ता परिवर्तनका लागि नभई मतदाता नामावलीको विशेष गहन संशोधन (एसआईआर) विरुद्ध भइरहेको प्रदर्शनमा सहभागी हुन भारत आएको बताएका छन्।

बिहीबार बेंगलुरुको फ्रिडम पार्कमा आयोजित प्रदर्शनलाई सम्बोधन गर्दै राठीले ‘म यहाँ सत्ता परिवर्तनका लागि आएको होइन’ भनेका हुन्। उनले एसआईआर प्रक्रियामा निर्वाचन आयोगबाट पारदर्शिता र जबाफदेहिता नभएको आरोप लगाए।

राठी नागरिक समाजका समूह र ककरोच जनता पार्टी (सीजेपी) ले आयोजना गरेको प्रदर्शनमा सीजेपीका संस्थापक अभिजित दिप्के र अभिनेता प्रकाश राजसँगै सहभागी भएका थिए। प्रदर्शनकारीहरूले मुख्य निर्वाचन आयुक्त ज्ञानेश कुमारको राजीनामा माग गरेका थिए।

विज्ञापन

प्रकाश राजले एसआईआर प्रक्रिया खारेज गर्न माग गर्दै यो विषय मतदाता सूचीबाट नाम हटाउने कुरामा मात्र सीमित नभई नागरिकको मर्यादा र अधिकारसँग जोडिएको बताए। उनले ज्ञानेशमाथि प्रधानमन्त्री नरेन्द्र मोदी र गृहमन्त्री अमित शाहको निर्देशनमा काम गरिरहेको आरोप लगाए।

सीजेपीका संस्थापक अभिजित दिप्केले एसआईआरअन्तर्गत मतदाता नाम हटाउने कामले भाजपाको विरोध गर्ने मानिसलाई मतदान अधिकारबाट वञ्चित गर्ने उद्देश्य राखेको आरोप लगाए। उनले मोदी र निर्वाचन आयोगमाथि लोकतन्त्र कमजोर बनाएको तथा मतदाताको अधिकार खोसेको आरोप पनि लगाए।

दिप्केले ज्ञानेश कुमारले राजीनामा नदिएसम्म देशभर आन्दोलन जारी राख्ने बताएका छन्। प्रदर्शनमा महिला, विद्यार्थी र नागरिक समाजका सदस्य सहभागी भएका थिए। उनीहरूले एसआईआर प्रक्रिया खारेज गर्न र कुमारको राजीनामा माग गर्दै नाराबाजी गरेका थिए।

आयोजकका अनुसार कर्नाटकभर एसआईआरबाट प्रभावित मानिसका विषयमा आवाज उठाउन ‘जनताको न्यायाधिकरण’का रूपमा प्रदर्शन आयोजना गरिएको हो। प्रदर्शनस्थलमा ‘त्रुटि ४०४-नाम भेटिएन’ र ‘हामीलाई नमेटाउनुहोस्, हाम्रो कुरा सुन्नुहोस्’ जस्ता नारा लेखिएका पोस्टर राखिएका थिए।