पहाडी गाउँको कथा बोकेको फिल्म ‘पहाडको घाम’ शुक्रबारदेखि प्रदर्शनमा

रित्तिँदै गएका पहाडी गाउँ र त्यहाँ एक्लिएका वृद्धवृद्धाको जीवनमा आधारित फिल्म ‘पहाडको घाम’ शुक्रबारदेखि प्रदर्शनमा आउँदैछ। निर्माताका अनुसार फिल्म देशभरका ६० हलमा एकैसाथ रिलिज हुनेछ।

फिल्मको कथा छोराछोरी वैदेशिक रोजगारीमा गएपछि गाउँमा एक्लै बसेका एक वृद्ध दम्पतीको वरिपरि घुम्छ। निर्देशक प्रकाश भण्डारीका अनुसार यो कथा कुनै एउटा परिवारको होइन, हजारौं नेपाली गाउँको साझा यथार्थ हो।

गाउँमै छायांकन

फिल्मको पूरै छायांकन पश्चिम नेपालका दुई गाउँमा गरिएको छ। छायांकन टोली करिब दुई महिना गाउँमै बसेको थियो। निर्देशक भण्डारी भन्छन्, गाउँलेले आफ्नो घर, खेत र गोठ सबै छायांकनका लागि खुला गरिदिए। उनीहरूको सहयोगबिना यो फिल्म सम्भव थिएन।

विज्ञापन

फिल्ममा मुख्य भूमिका रंगमञ्चका वरिष्ठ कलाकार शान्ता घिमिरे र कृष्णबहादुर रानाले निभाएका छन्। केही सहायक भूमिकामा स्थानीय गाउँलेलाई नै अभिनय गराइएको छ।

हामीले गाउँको कथा गाउँकै मान्छेको आँखाबाट भन्न खोजेका छौं। यसमा न खलनायक छ, न नाचगान, केवल जीवन छ। — निर्देशक प्रकाश भण्डारी

महोत्सवमा प्रशंसा

फिल्म यसअघि एक अन्तर्राष्ट्रिय फिल्म महोत्सवमा प्रदर्शन भई दर्शक र समीक्षकबाट प्रशंसा बटुलिसकेको छ। निर्माता टोलीले नेपाली दर्शकबाट पनि उत्तिकै माया पाउने आशा गरेको छ।

करिब दुई घण्टा अवधिको फिल्ममा संगीत युवा संगीतकार निशान्त श्रेष्ठले दिएका छन्। फिल्मको एउटा लोकधुनमा आधारित गीत सामाजिक सञ्जालमा पहिले नै चर्चित बनिसकेको छ।