कातिक २६, काठमाडौं । प्रतिबन्धित नेकपा माओवादी (विप्लव) समूहको नाम लिएर चन्दा माग्ने चार जना पक्राउ परेका छन् । विप्लव समूहको नाम लिएर एजुकेसनल कन्सल्टेन्सी व्यवसायीसँग ३ करोड रुपैयाँ चन्दा मागेको अभियोगमा महानगरीय अपराध महाशाखाको टोलीले चार जनालाई पक्राउ गरेको हो ।
पक्राउ पर्नेमा नुवाकोट ककनी गाउँपालिका–२ का विन्तोष सिलवाल (सुनार), रामेछाप सुनापति गाउँपालिका–३ का रामदल श्रेष्ठ, काभ्रे तिमाल गाउँपालिका ५ का तीर्थमान तामाङ र चितवन भरतपुर–१३ का नन्दुराज आचार्य छन् ।
उनीहरूलाई सोमबार साँझ काठमाडौंका विभिन्न स्थानबाट पक्राउ गरेको महाशाखाले जनाएको छ । महाशाखा प्रमुख एसएसपी दीपक थापाले पक्राउ परेकाहरूले विप्लव माओवादीमा रहेर काम गरेको स्वीकार गरेको जनाएका छन् ।
पक्राउ पर्नेमध्ये नन्दुराज आचार्य कानुन व्यवसायी हुन् । उनले ३ करोड रकमको ‘डिल’ दुई करोडमा मिलाइदिने भन्दै कन्सल्टेन्सी व्यवसायीसँग कुराकानी गरेको खुलेको छ ।
उनीहरूले मागअनुसार चन्दा नदिए भौतिक कारबाही गर्ने समेत चेतावनी दिँदै आएका थिए । हाल पक्राउ परेका सबैमाथि आपराधिक लाभ लिन नहुनेसम्बन्धी कसुरमा जिल्ला अदालत, काठमाडौंबाट तीन दिन म्याद थप गरेर अनुसन्धान भइरहेको छ ।
प्रदेश १
प्रदेश २
बागमती
गण्डकी
प्रदेश ५
कर्णाली
सुदूरपश्चिम