विराटनगर : घरभित्र पसेको भन्दै एक बालिकामाथि कुटपिट भएको छ । मोरङको उर्लाबारी नगरपालिका–४ थापाडाँगीमा एक दलित बालिकामाथि छिमेकीले निर्घात कुटपिट गरेको छन ।१२ वर्षीया फूलसरी मग्राती (सार्की) माथि छिमेकीबाटै कुटपिट भएको मोरङ प्रहरी प्रमुख एसपी सन्तोष खड्काले जानकारी दिए ।
बालिकामाथि स्थानीय ६० वर्षीय नन्दलाल श्रेष्ठ, श्रीमती ४७ वर्षीय निर्मला श्रेष्ठ र छोरा २३ वर्षीय अमीर श्रेष्ठले कुटपिट भएको अनुसन्धानबाट खुलेको एसपी खड्काले बताए । बालिकाकी आफन्त दुर्गाकुमारी रोकाले इलाका प्रहरी कार्यालय उर्लाबारीमा बुधबार जाहेरी दिएपछि घटना बाहिरिएको थियो ।
दुर्गाकुमारीको बयानका अनुसार श्रेष्ठको घरमा बालिका फ्रिजमा आइस जमेको पानी लिन पसेकी थिइन् । दुर्गाकुमारीकी ६ वर्षीया नातिनी लडेर चोट लागेपछि घाउ सेक्न फ्रिजमा जमेको आइस निकाल्न भनेर फूलसरी मग्राती श्रेष्ठको घरमा पसेपछि परिवारै लागेर कुटपिट गरेको पाइएको प्रहरीले जनाएको छ ।
‘कुटपिट हुन थालेपछि बालिका चिच्याएको सुनेर छुट्याउन म गएँ,' दुर्गाकुमारीले भनिन्, 'यस्तो गर्न हुँदैन भन्दा मलाई पनि लछारपछार पार्दै कुटपिट गरियो ।' उनका अनुसार दुई महिना अगाडि पनि श्रेष्ठ परिवारले ६ वर्षीया नातिनीलाई घरभित्र पसेको भन्दै कुटपिट गरेका थिए ।
सानैमा आमाबुवा बेपत्ता भएपछि दुर्गाकुमारीले नै आश्रय दिएर उनलाई पालिरहेकी छन् । कुटपिटबाट घाइते भएकी बालिकाको उपचार र स्वास्थ्य परीक्षण उर्लाबारीकै मंगलबारे अस्पतालमा भएको छ । किटानी जाहेरी परेपछि प्रहरीले कुटपिटमा संलग्न अमीरलाई पक्राउ गरेको छ । उनका बुवाआमा नन्दलाल र निर्मला फरार रहेका कारण खोजी भइरहेको प्रहरीले जनाएको छ ।
प्रहरीले कुटपिटमा संलग्नविरुद्ध जातिय छुवाछुत ऐन अन्तर्गत कारबाही अघि बढाउन घटनाको अनुसन्धान थालिएको जनाएको छ ।
कुटपिटबाट बालिकाको ढाडमा लागेको चोट लागेको छ । घटनाको थप अनुसन्धान भइरहेको इलाका प्रहरी कार्यालय उर्लाबारी जानकारी दिएको छ ।
प्रदेश १
प्रदेश २
बागमती
गण्डकी
प्रदेश ५
कर्णाली
सुदूरपश्चिम